Aberto o prazo das axudas galegas con cargo ao 0,7% do IRPF para programas sociais de mocidade e voluntariado

A Xunta abre o prazo para que as entidades xuvenís e as de voluntariado accedan ás axudas destinadas a programas sociais con cargo ao 0,7% do IRPF e do imposto de sociedades en 2024.

O Diario Oficial de Galicia (DOG) publicou este mércores a convocatoria da Consellería de Cultura, Lingua e Xuventude, que reforza con máis de 1,4 millóns de euros estas axudas e, como novidade, incorpora dúas novas liñas para subvencións dirixidas a acondicionar locais e adquirir equipamento e material.

Na convocatoria deste ano, detallou a Xunta nun comunicado, establécense catro liñas de axudas. Unha para actuacións dirixidas á mocidade, outra para accións destinadas ao voluntariado e outras dúas para mellorar, respectivamente, os locais das entidades xuvenís e de voluntariado.

Desta forma, buscan que conten con partidas para acondicionar as súas instalacións e posibilitar a adquisición de material inventariable e equipamento. O prazo para presentar as solicitudes estará aberto ata o 17 de outubro e debe realizarse obrigatoriamente pola sede electrónica da Xunta.

Programa de voluntariado en Coruxo, Vigo.. AFUNDACIÓN