Un home ferido de consideración e medio cento de becerros mortos tras un incendio nunha granxa de Lalín
O 112 indica que este lume se iniciou supostamente nunha zona de palla acumulada.
Por Europa Press / Redacción | PONTEVEDRA | 20/09/2024 | Actualizada ás 17:51
Un incendio nunha granxa en Lalín deixou ao dono da explotación ferido de consideración, polo que foi necesario o seu traslado a un centro hospitalario, á vez que provocou a morte de medio cento de becerros. Segundo informan por parte do 112 a Europa Press Galicia, sobre as 13.30 horas recibiron aviso dun incendio no lugar de Barciela, parroquia de Vilatuxe, no municipio de Lalín. Así, mobilizaron a Bombeiros de Silleda, GES de Lalín, Policía Local e Garda Civil, entre outros medios. Servizos de emerxencia consultados por Europa Press confirman que morreron ao redor de 50 becerros neste lume que se iniciou, supostamente, nunha zona de palla acumulada. O dono da explotación sufriu queimaduras de consideración polas que foi derivado a un hospital.
