Chega Aitor a Galicia, a primeira gran borrasca con ventos fortes e choiva intensa

A borrasca Aitor, o primeiro gran temporal do outono, deixará na comunidade galega precipitacións "fortes, cuantiosas, xeralizadas e persistentes" desde a mañá deste mércores ata o mediodía deste xoves, polo que se activará a alerta laranxa en diferentes puntos da comunidade. "Entrará unha fronte moi activa acompañada por un río atmosférico, é dicir, unha cinta de humidade que vén desde latitudes mais baixas e que achega un extra de humidade á fronte, por tanto, as precipitacións van ser máis cuantiosas", explicou Meteogalicia a Europa Press.

Así, desde este mércores acumularanse ao redor de 80 litros por metro cadrado no oeste, suroeste da Coruña, nas Rías Baixas e no interior de Pontevedra, motivo polo cal se activou a alerta laranxa (risco importante) nesas zonas ata este xoves. Así mesmo, o resto da comunidade galega tamén estará en alerta, pero neste caso activarase o aviso amarelo por precipitacións que poden superar os 40 litros por metro cadrado. Ante as fortes choivas a Xunta recomenda circular con precaución e informarse antes do estado das estradas, non atravesar zonas alagadas e non aparcar na beira dos ríos.

Así mesmo, está activa a alerta amarela por temporal costeiro no noroeste, oeste e suroeste da provincia da Coruña, na Mariña lucense e na costa de Pontevedra por vento do suroeste de ata 61 quilómetros por hora (forza 7) ao redor de estaca de Bares e mar dentro. Ademais, no noroeste da Coruña e na Mariña lucense o aviso amarelo será tamén por ventos que poden alcanzar os 90 quilómetros por hora, mentres que no oeste, interior e suroeste da Coruña, no centro e na montaña de Ourense e no interior de Pontevedra, os refachos de vento poden alcanzar os 80. Con todo, despois desta fronte orixinarase un réxime de chuvascos durante este xoves, pero a partir do venres entrará na comunidade un anticiclón e o tempo será seco durante esta fin de semana.

FRÍO

De cara ao fin de semana, a borrasca 'Aitor' retirarase pero tras o seu paso abrirase un paso de ventos fríos no noroeste, que traerán unha masa de aire fría que quedará asentada en España o sábado e o domingo, polo que se esperan ceos máis despexados e pola noite baixarán as temperaturas, polo que poderían chegar as primeiras xeadas nocturnas nalgunhas zonas do interior.