Galicia reivindica no Comité das Rexións a necesidade de afrontar a migración desde o marco europeo

O director xeral de Relacións Exteriores e coa Unión Europea, Jesús Gamallo, participou este martes na Comisión de Cidadanía, Gobernación e Asuntos Institucionais e Exteriores do Comité Europeo das Rexións onde, entre outras cuestións, aprobouse un ditame sobre o papel das rexións e das cidades na estratexia da UE con África.

Segundo informa a Xunta, Galicia e outras rexións concordaron nos beneficios de cooperar con este continente, pero reclamaron a descentralización desta tarefa para mellorar a súa eficacia. "En concreto, apostaron por instrumentos de financiamento inclusivos que apoien as autoridades locais africanas e por unha arquitectura institucional que fomente esta cooperación descentralizada", explica a Consellería de Presidencia.

Sobre a cuestión da migración, "o Comité das Rexións propón a creación de visados para profesionais internacionais e fomentar así a migración legal no marco da UE". "Con todo, Galicia e outras rexións europeas coinciden en que esta fórmula non é a única que debe empregarse para abordar o reto demográfico", sinala a Xunta. Ademais, Jesús Gamallo interveu na asignación dun futuro ditame sobre o Estado de Dereito e no debate interno en relación coa creación de novos foros de diálogo entre o Comité das Rexións e os entes locais e rexionais dos países candidatos á adhesión.

Varios migrantes procedentes de Canarias cunha voluntaria de Accem, na Casa de Cultura de Dorrón, a 17 de novembro de 2023, en Sanxenxo | Fonte: Elena Fernández - Arquivo