O Goberno central transfire 1.243 millóns a Galicia pola actualización de entregas a conta de 2024
Por Europa Press / Redacción | SANTIAGO DE COMPOSTELA | 27/09/2024 | Actualizada ás 15:51
O Ministerio de Hacienda transferiu 1.243 millóns de euros a Galicia durante o mes de setembro pola actualización das entregas a conta de 2024. Desa cantidade, hai 774 millóns que corresponden ao importe actualizado das entregas a conta do mes de setembro de 2024, que se abonaron este venres, mentres que os 469 millóns restantes supoñen a actualización das entregas a conta de xaneiro a agosto de 2024, que foron satisfeitas anteriormente cos importes da prórroga orzamentaria e agora actualízanse.
O pago das entregas a conta efectúase mensualmente, a través de dous ingresos ás comunidades e cidades autónomas de Ceuta e Melilla: un ao principio do mes e outro ao final. Segundo informa Facenda nun comunicado, dada a situación de prórroga orzamentaria, co decreto de actualización aprobado polo Goberno as comunidades van poder percibir en 2024 os recursos que corresponden ás previsións de ingresos tributarios deste ano, en lugar das que se tiveron en conta na elaboración do orzamento de 2023.
No caso de Galicia a actualización supón recibir 9.374 millóns de euros de entregas a conta, o que significa 586 millóns de euros máis por este concepto que o ano pasado, un aumento do 6,7%. No caso de Galicia o próximo ano recibirá as maiores entregas a conta da súa historia con 10.262 millóns de euros, un 9,5% máis que en 2024. Son 888 millóns máis por este concepto. En total, incluíndo a liquidación de 2023, Galicia recibirá o próximo ano do sistema de financiamento 10.857,5 millóns de euros.
Desta forma, Facenda resalta que, en sete anos de Goberno de Pedro Sánchez, Galicia recibiría un 40% máis de recursos que no sete anos de Mariano Rajoy como presidente. Son 18.317,7 millóns de euros máis.
