O alcalde de Muxía reta aos partidos que impulsan a moción de censura: "Que fagan públicos os detalles do acordo"
O alcalde, o socialista Iago Toba, considera "claro" que queren "evitar a reacción da rúa". "Saben que os veciños non aceptan a moción", insistiu.
Por Europa Press / Redacción | SANTIAGO DE COMPOSTELA | 30/09/2024 | Actualizada ás 17:24
O alcalde do municipio coruñés de Muxía, o socialista Iago Toba, retou ás tres forzas políticas que impulsan a moción de censura no Concello a que "fagan públicos de forma inmediata os detalles do acordo". "Falan de transparencia, pero está claro que teñen moito que esconder, os veciños de Muxía merecen saber como será o goberno que sairá da moción, quen levará cada área ou como repartirán as dedicacións", manifestou Toba.
Pola contra, o alcalde considera "claro" que queren "evitar a reacción da rúa". "Saben que os veciños non aceptan a moción", insistiu. Así, reprochou que hai "demasiadas preguntas sen contestar" e defendeu que "esta forma de actuar" reflicte que "teñen cousas que esconder que poden pór en risco a viabilidade da operación".
