A Xunta revisará o plan de Protección Civil fronte ao risco de inundacións, pasando os concellos con plan propio de 62 a 51

O Consello da Xunta deu o visto e prace á revisión do Plan Especial de Protección Civil fronte ao risco de inundacións (Inungal) para adaptalo ás novas demandas. Así o expuxo o titular do Executivo galego, Alfonso Rueda, que precisou que a primeira versión data de 2001, cunha posterior renovación en 2016. Agora, engadiu, procederase a unha actualización "por novas normas que obrigan a facer estas modificacións".

A conselleira de Infraestruturas e Mobilidade, Ethel Vázquez, e o alcalde de Baiona, Jesús Vázquez Almuíña, supervisan os traballos realizados en Sabarís para reducir o risco de inundacións | Fonte: XUNTA DE GALICIA - Arquivo

"É un documento que establece como teñen que estar organizados os recursos ante unha inundación ou risco de inundación", explicou. Desta forma incorporaranse novidades como estudos actualizados ou a nova normativa en relación á atención a persoas con discapacidade ou a evacuación de animais domésticos. Entre outras cuestións, tamén se reduce o número de concellos que deberán ter plan propio, de 62 a 51.