O conselleiro de Sanidade pide á ministra iniciar xa o MIR de Urxencias e prolongar a xubilación de médicos ata os 72
Por carta, Gómez Caamaño solicita tamén eliminar a taxa de reposición nas especialidades máis deficitarias.
Por Europa Press / Redacción | SANTIAGO | 01/10/2024 | Actualizada ás 15:12
O conselleiro de Sanidade, Antonio Gómez Caamaño, instou ao Goberno central a "iniciar canto antes" a formación de especialistas en Medicina de Urxencias e a autorizar a prolongación da idade máxima de xubilación dos sanitarios ata os 72 anos, ademais de eliminar a taxa de reposición, polo menos nas especialidades máis deficitarias.
Así o solicitou o responsable do departamento autonómico nunha carta dirixida á ministra de Sanidade, Mónica García, á que lle pide "concretar" o alcance do problema exposto polo presidente da Xunta de Galicia, Alfonso Rueda, na súa reunión co presidente do Goberno, Pedro Sánchez, o pasado venres 20 de setembro.
O conselleiro lembrou que Galicia é unha das autonomías que "veñen chamando a atención desde hai anos" sobre a falta de profesionais sanitarios dispoñibles, sobre todo nas especialidades de Medicina Familiar e Comunitaria e Pediatría. "O maior problema común do Sistema Nacional de Saúde na medida en que pon en risco a asistencia sanitaria de calidade que temos comprometida", remarca.
E aínda que recoñece Caamaño que, "tras moito tempo de inacción", déronse "pasos adiante" co impulso de medidas acordadas "moito tempo atrás" (como a aprobación do Decreto para a creación da especialidade médica de Urxencias, a modificación do sistema de prazas MIR e a flexibilización dos criterios para a acreditación de prazas e centros), ve necesario adoptar medidas que completen estes cambios.
Co marco actual, argumenta, resulta "imposible" comezar a formación especializada de médicos de urxencias antes de 2026, "o que supón que os primeiros profesionais non estarán dispoñibles para a súa contratación ata 2030". O mesmo sucede, apunta, coa incorporación á oferta formativa dos novos centros e prazas de formación especializada que se poderán acreditar conforme aos criterios modificados.
HOMOLOGACIÓN DE TÍTULOS ESTRANXEIROS
A este respecto, o conselleiro pide que se tomen medidas que permitan iniciar "canto antes" a formación de especialistas e que se incorporen os centros e prazas acreditados. Demanda ademais, e con carácter urxente, que se autorice a prolongación da idade máxima de xubilación dos profesionais sanitarios ata os 72 anos, cando menos nas especialidades máis deficitarias. Tamén para estas especialidades cre "prioritario" que se elimine a taxa de reposición.
Xa por último, insiste en que é "imprescindible" desbloquear e axilizar a homologación de títulos de médicos estranxeiros. Na misiva, o conselleiro adxunta o acordo adoptado pola Comisión de Sanidade do Parlamento galego o pasado 26 de setembro coa aprobación dunha proposición non de lei que reclamaba ao Goberno central unha serie de medidas urxentes para tentar paliar o déficit de especialistas en Medicina Familiar e Comunitaria e Pediatría.
