Santiago aumenta as frecuencias de voos con Bilbao
Air Nostrum programa ata 21 frecuencias semanais este inverno entre as dúas cidades.
Por Europa Press / Redacción | BILBAO | 08/10/2024 | Actualizada ás 12:53
Air Nostrum, a aerolínea franquiciada de Iberia para voos rexionais, vai incrementar un 51% as prazas entre Santiago de Compostela e Bilbao desde o 27 de outubro, e programa ata 21 frecuencias semanais este inverno entre as dúas cidades.
Nun comunicado, a compañía sinalou que se trata unha ruta "histórica", das máis antigas da compañía, xa que se cumpren 27 anos desta operativa. Agora Air Nostrum anunciou que vai programar ata un 51% máis de prazas respecto de 2023 cun "esquema horario ideal en ambos os sentidos con ata 21 frecuencias semanais".
Segundo apuntou, estes novos horarios veñen satisfacer tanto a demanda de tráfico de pasaxeiros de negocios como o vacacional "cunha importante parte da oferta enfocada a amortizar ao máximo o fin de semana".
En concreto, os luns, xoves e venres a ruta contará con ata catro frecuencias en cada sentido. Segundo indicou, para os pasaxeiros a conexión entre as dúas cidades estará asegurada e "será moi completa xa que haberá un voo en cada sentido cada tres horas". Ademais, os martes, mércores e domingos a ruta contará con tres frecuencias en cada sentido. Os sábados é o único día no que non se programan voos.
Air Nostrum lembrou que, desde que se comezou a comercializar esta ruta en 1997, xa máis dun millón de persoas voaron entre estas dúas cidades, un fito alcanzado durante este ano 2024.
