CxG, dividida entre apostar pola marea ou camiñar en solitario
Compromiso reproducirá o vindeiro 23 de xaneiro, en parte, o debate que xa tivo antes dos comicios. Na Executiva desta fin de semana as posicións estiveron encontradas. Rafael Cuíña considera xa "inevitable" esa confluencia.
- O camiño de Compromiso
- Outras voces de CxG apostan por “diluírse” no “nacionalismo clásico”
- Voces en Compromiso piden “dar un xiro decidido” a esta formación
Por Xurxo Salgado | Compostela | 15/01/2016 | Actualizada ás 08:00
Compromiso por Galicia volve estar ante un gran dilema; camiñar sós as eleccións autonómicas ou integrarse en coalicións electorais de amplo espectro, nomeadamente, a que se promoven desde as mareas.
Será o vindeiro 23 de xaneiro cando o Consello Político Nacional decida o rumbo que vai coller esta formación política nacionalista. Enriba da da mesa hai un documento que apoian, entre outros, o ex senador co BNG, Xoán Manuel Pérez Bouza; o líder de CxG e concelleiro en Outes, Manuel González ou o ex candidato de CxG ás Eleccións ao Parlamento Europeo, Paulo Carlos López. Un documento que aposta por unha confluencia con outras formacións, nomeadamente as mareas, nunha gran candidatura popular.
Precisamente, ese debate xa tivo lugar na Executiva que se celebrou o pasado sábado. Alí houbo voces a favor e en contra. O actual líder de CxG, Xoán Báscuas, e outros membros da Executiva rexeitaron esa posibilidade, e insistiron, segundo as fontes consultadas, en que Compromiso ten que manter unha liña propia de actuación. Outro peso pesado da formación, Rafael Cuíña, alcalde de Lalín, que durante as pasadas xerais participou nalgún acto con Nós-Candidatura Galega, recoñeceu que “é inevitable” a confluencia de CxG con En Marea.
“É certo que hai xente que desexa xa que CxG comece no proceso de confluencia de En Marea. É unha extensión do debate da convención anterior”, sinala Báscuas en declaracións ao GC. “É posible que CxG teña que dar un debate semellante a aquel pero como é preceptivo a última proposta tena a afiliación, como foi sempre”, engade. Refírese á xuntanza que houbo hai un mes, na que CxG tivo que decidir se renunciaba ir ás xerais, ír nun pacto co BNG na candidatura Nós ou con En Marea. Finalmente, triunfou a primeira opción que era a que defendía o propio Báscuas.
Por iso, aclara; “esa xuntanza –o Consello Político Nacional-- pode marcar un rumbo pero será a afiliación quen decida finalmente porque esta no é unha formación de corte clásico cando a dirección di o que se vai facer cun báculo. Aquí é a militancia quen manda”.
Confluencia
Pola súa banda, Manuel González, en declaracións a GC suliña que “hai varias persoas que queremos que se dea un debate e tratar de reconducir o proxecto de CxG e achegalo ás mareas mantendo a autonomía de CxG como forza política”.
De feito, nun artigo publicado no GC, González di que “é momento de realizar unha aposta decidida por sumar o seu capital político e o seu acervo ideolóxico a ese suxeito en construción nucleado pola Marea”. “Negar que iso significa facer concesións na nosa práctica política e tamén concesións ideolóxicas sería negar o evidente. Pero non tomar esa decisión sería ignorar o que, gústenos ou non, nos vén dicindo a sociedade dende que nacemos até hoxe”, engade.
Neste sentido, lembra que no ámbito municipal, as sinerxías e a compatibilidade coa Marea “é practicamente plena”. Alí onde CxG ten alcaldía (Vilar de Santos, Lalín e Muros) e onde obtivo un resultado superior ao 20% (Maceda, Outes e Ourol) Compromiso non competiu coa Marea e “percibiuse como a alternativa ás forzas políticas clásicas. “Evidentemente a compatibilidade é plena alí onde o partido ou a nosa afiliación se presentou en fórmulas plurais asimilables á Marea como en A Coruña, A Pobra, As Pontes, Culleredo, Lugo, Noia ou Sarria. Tamén o é na maioría dos concellos onde nos presentamos pero non obtivemos representación”, reflexiona.
Iván Marrube e Miguel Barros
Nos últimos días, Galicia Confidencial, a través da súa sección GCAberto, publico dous artigos de opinión de destacados militantes de Compromiso defendendo puntos de vista diferentes. Así, mentres o ex candidato de CxG en Lugo, Iván Marrube apostaba por unha confluencia coas mareas, o ex candidato por Vigo, Miguel Barros, insistía en manter a personalidade propia da formación.
“Compre sen demora, dar un xiro decidido, marcar xa novas coordenadas, dirixir o barco de Compromiso cara unha integración na flota da marea e remar de forma útil para un cambio de goberno no País”, indica Marrube. Pola súa banda, Barros di aposta por “afrontar os custes de teorizar a moderación como forza autónoma ou ben diluírse nas organizacións do nacionalismo clásico cuxo útero ideolóxico aínda non abandonamos”.
