Asociacións rexeitan o aparcadoiro de pago do novo Hospital Montecelo: "aparcas máis barato nas leiras"

A Federación de Asociacións Veciñais Castelao, de Pontevedra, expresou o seu rexeitamento ao aparcadoiro proxectado no novo hospital Montecelo e reclama á Xunta que sexa gratuíto e que se habiliten máis prazas. Segundo alegou a entidade veciñal, as 892 prazas de aparcadoiro previstas son un número "escasísimo", xa que só os traballadores de Montecelo superan as 2.200 persoas.

O presidente da Federación Castelao, Juan Manuel Loureiro, non descarta a posibilidade de convocar mobilizacións de protesta na rúa, tal e como trasladou nunha rolda de prensa. Así mesmo, os representantes veciñais aseguraron que o aparcadoiro previsto pola Xunta non resolverá o problema de falta de prazas de estacionamento e xerará unha importante carga económica para as familias das persoas que estean ingresadas neste centro sanitario.

Segundo sosteñen, os aparcadoiros habilitados nas leiras situadas ao redor de Montecelo, que cobran 1,5 euros por aparcar un día enteiro, serán unha alternativa máis barata á do aparcadoiro do hospital que terá unha tarifa diaria de oito euros.

PROGRAMA

Por outra banda, o Concello de Pontevedra promove un programa contra a soidade non desexada e de vivenda compartida da man da ONG Boa Vida. A concelleira de Benestar Social, Anabel Gulías, e a presidenta de Boa Vida, Pepa Vázquez, informaron este venres en rolda de prensa deste programa, que conta con dúas actuacións: o proxecto de Vida Compartida e o de Fogares Creativos, que nunha primeira fase de avaliación desenvolveranse ata final de ano en catro parroquias: Santa María de Xeve, Santo André de Xeve, Salcedo e Cerponzóns.