Ana Miranda (BNG) acusa á Xunta de utilizar a Fundación Galicia Europa de xeito "partidista"
Por E.P. | SANTIAGO DE COMPOSTELA | 15/10/2024 | Actualizada ás 12:16
A eurodeputada do BNG, Ana Miranda, denunciou a "actitude partidista" da Xunta e da Fundación Galicia Europa ao "non contar" cos eurodeputados e a eurodeputada dos tres partidos con representación na cámara europea no debate sobre as políticas das rexións da UE, no que interveu o conselleiro de Facenda e Administración Pública, Miguel Corgos, e ao que "só se convocou ao eurodeputado 'popular'.
"Como eurodeputada galega do BNG, e a única eurodeputada que forma parte da Comisión de Política Rexional do Parlamento Europeo, queixume moito que a Xunta realice unha axenda de traballo en Bruxelas e non teña en conta a nosa voz", denunciou Miranda, que lembrou que, precisamente, a súa voz "é a única que está na comisión que vai decidir sobre os fondos europeos nos próximos anos".
Por outra banda, tamén criticou o "uso partidista" das redes sociais da Fundación Galicia Europa e da Xunta, nas que o conselleiro aparece reunido con membros da Comisión nun foro celebrado no Europarlamento. Ademais, engadiu, Corgos aparece nunha fotografía co eurodeputado do PP, Francisco Millán Mon, "que non é membro do Comité de Política Rexional, nin do Comité das Rexións".
Ana Miranda lamentou que a Xunta difunda esa imaxe "sen gardar o mínimo decoro" e ocultando a existencia de tres partidos con representación no Parlamento Europeo. "Ou fas unha fotografía con todos os eurodeputados e a eurodeputada, ou fas unha fotografía sen eles; pero non se pode facer un uso partidista por parte do goberno e a Fundación Galicia Europa", proclamou.
