O BNG esixe expliacións ao Goberno polo "xenocidio" en Gaza e os ataques no Líbano, Iemen ou Irán
Rego insiste en denunciar a "crueldade" de Israel tras as "últimas imaxes de nenos queimados vivos".
Por Europa Press / Redacción | MADRID | 15/10/2024 | Actualizada ás 13:14
Esquerra Republicana e o BNG, adscrito ao Grupo Mixto do Congreso, pediron a comparecencia urxente do ministro de Asuntos Exteriores, José Manuel Albares, en sesión plenaria para informar da posición do Goberno en relación coa ofensiva militar de Israel en Palestina e Líbano.
Estes dous partidos, aliados parlamentarios do Goberno, xa forzaron outras comparecencias do Goberno no Pleno do Congreso ao solicitar o apoio de PP e Vox, como ocorreu coa súa solicitude de explicacións da ministra de Vivenda, Isabel Rodríguez, que deberá render contas no hemiciclo o próximo día 23.
A petición de comparecencia de Albares foi anunciada polo deputado do BNG, Néstor Rego, quen considera necesario que Albares explique a posición española ante "o xenocidio que se está producindo en Gaza por parte de Israel e a extensión do conflito a outros países da rexión" como Líbano, Iemen ou Irán, nunha "escalada tremendamente perigosa".
Rego fixo fincapé en que o ministro de Exteriores non comparece ante o Pleno desde decembro do ano pasado por este asunto e insistiu en denunciar a "crueldade" de Israel, tras as "últimas imaxes de nenos queimados vivos, bombardeados en escolas e hospitais, que arrepían ao conxunto da humanidade".
Esas imaxes, subliñou, "reclaman de todas e de todos nós accións que contribúan a pór fin a esa actuación bárbara do Estado de Israel e a respectar a vida e o futuro da poboación de Palestina".
