A Xunta abre desde este mércores as solicitudes de autorización para queimas agrícolas

A Xunta abriu desde este mércores as notificacións para realizar queimas agrícolas por parte de particulares, tanto desde a páxina web habilitada como mediante o 012. Desta forma, as persoas que soliciten un novo permiso durante esta xornada, tendo en conta que a comunicación debe efectuarse sempre con dous días de antelación, poderán realizar a queima a partir deste venres, 18 de outubro.

Como de forma habitual, no portal de Internet destinado a comunicar as queimas de restos agrícolas amontoados, os cidadáns deberán confirmar que se trata dunha queima de palla e ou material natural agrícola, non perigoso, utilizado en explotacións agrícolas ou gandeiras.

A maiores, retómanse desde esta xornada as solicitudes de autorización para efectuar queimas de restos forestais amontoados. Neste caso, como é habitual, débese de contar con autorización administrativa dado o maior risco da actuación.

Queimas agrícolas | Fonte: UNIUNA