Novo enfrontamento entre Jácome e a Xunta a conta do programa de axuda a persoas con necesidades

O alcalde de Ourense, Gonzalo Pérez Jácome, denunciou este venres que a Xunta "curta os fondos dos cartóns moedeiro", un recurso destinado a axudar a familias con menores en risco de exclusión social.

Así, sinalou que é a propia administración a que tramita as solicitudes das familias que solicitan este cartón e realizan os informes de valoración por parte das traballadoras sociais, pero "non se poden tramitar estas axudas por falta dos fondos da Xunta" de Galicia.

"Quedan fóra deste recurso moitas familias que tiñan que acceder dada a súa situación económica", manifestou Pérez Jacome argumentando que é ao Goberno galego a quen lle corresponde "levar o peso das políticas sociais xunto coa administración estatal".

"FINANCIAMENTO DO GOBERNO CENTRAL"

Pola súa banda, a Consellería de Política Social apuntou que o Programa Básico é unha iniciativa posta en marcha e financiada exclusivamente polo Goberno central, e a colaboración das comunidades nesta medida limítase a "a derivación das solicitudes a través dos servizos sociais comunitarios".

Nesta liña, aseverou que Galicia "é unha das comunidades autónomas con maior nivel de execución" e que mais solicitudes derivou grazas a contar "con ferramentas propias como a historia Social única, que permite chegar a un maior número de beneficiarios". Tamén asegurou que "desde o primeiro momento" advertiuse ao Goberno Central que "o orzamento consignado para este programa era insuficiente" para poder atender ás persoas máis vulnerables con menores a cargo.

PP DE OURENSE

Tamén desde o Partido Popular Municipal ourensán responderon ao alcalde por medio da edil Noelia Pérez, quen insistiu en que o Programa Básico é unha iniciativa posta en marcha e financiada polo Goberno Central e lamentou que Jácome "sábeo perfectamente e aínda así mente e bótalle a culpa á Xunta".