Cobre San Rafael continúa á caza de traballadores nas feiras da contorna da súa mina

Continúa a estratexia de  Cobre San Rafael para captar traballadores da contorna do seu proxecto mineiro. Este fin de semana o seu percorrido será polos concellos próximos á mina de Touro-O Pino co obxectivo de recrutar novos talentos para a futura reactivación da produción de cobre en Galicia.

Desde o inicio da súa campaña de captación de currículos o pasado mes de setembro, a compañía destacou que non deixou de achegarse ás comunidades locais, apostando pola presenza nas feiras como epicentros da economía local, para ofertar novas oportunidades laborais.

Deste xeito, tal e como sinalou nun comunicado, o equipo de recursos humanos de Cobre San Rafael estará este sábado, día 19 de outubro, na feira de Sigüeiro; e o domingo, 20 de outubro, na feira de Lestedo.

Nestas localizacións, bríndase información sobre a iniciativa e recolleranse os currículos dos veciños interesados en sumarse ao proxecto. Estas paradas son unha oportunidade para coñecer máis sobre as vacantes dispoñibles, tanto para as persoas cualificadas como non cualificadas, con oportunidades laborais en áreas como operacións mineiras, planta de tratamento de auga e mineral, laboratorios, xestión ambiental, seguridade e saúde, e administración.

A empresa destacou que o seu proxecto se levanta como unha forza que reverterá o preocupante declive demográfico que sofre a comarca de Arzúa. Así, apunta que coa creación de 400 empregos directos, prioriza a contratación local, o que espera que contribúa á fixación de poboación en Touro e O Pino.

Cobre San Rafael comeza as obras do Plan de Restauración Integral das Augas da Antiga Mina de Touro | Fonte: Europa Press.