A plataforma de vítimas de Angrois reprocha a Puente: "Pasará á historia como o único ministro que non nos recibiu"

A plataforma de vítimas do accidente do tren Alvia ocorrido en Angrois en xullo de 2013 (sinistro polo que foron condenados o maquinista e un ex alto cargo da empresa pública Adif) critica que o ministro de Transportes, Óscar Puente, "despreza a seguridade" e "négase" a recibirlles. "Pasará á historia como o único que non recibiu ás vítimas da maior traxedia ferroviaria", advirte. Esta asociación solicitou en agosto unha reunión con Puente e a contestación que obtivo do ministerio foi a dispoñibilidade de que o encontro se producise cos responsables da Secretaría Xeral de Transporte Terrestre e Mobilidade Sustentable. 

Varias persoas cunha pancarta e carteis durante unha concentración das vítimas de Angrois, na estación de tren de Santiago, a 24 de xullo de 2024, en Santiago de Compostela | Fonte: César Arxina

Nun comunicado emitido este xoves, a plataforma lembra que "na súa toma de posesión o ministro dixo que o seu despacho está aberto". "Nada máis lonxe da realidade", incide. "Non recibirnos é un acto de covardía e hipocrisía", advirte o colectivo de vítimas, para as que o motivo desta negativa é "protexer ao seu 'amigo querido Pepe Blanco" e evitar asuntos como a creación dunha nova investigación independente como reclama a Unión Europea. Tamén cre a plataforma que, co seu non, Puente busca evitar "comprometerse a que a política non volva interferir á técnica en prazos de inauguración" e tamén "cesar á actual directora de seguridade de Adif", Esther Mateo, que elaborou unha peritaxe e defendeu a actuación da empresa pública durante o xuízo polo accidente. 

Agora, as vítimas tamén queren saber se o administrador de infraestruturas ferroviarias vai recorrer a sentenza que condena ao seu ex alto cargo por homicidios e delitos de lesións por imprudencia profesional grave. "Cúmprense tres meses desde que se ditou a sentenza e se condenou a Adif. Entre outras cuestións, a xuíza ditaminou que resultaba 'incomprensible' que Adif deixase este perigoso tramo sen tan importante protección, deixando recaer toda a responsabilidade no maquinista e 'sen analizar e xestionar os riscos en materia de seguridade' como obrigaba a lexislación", resalta na nota de prensa.

INFORME "INFAME"

"Levamos 11 anos reclamando que se faga unha investigación técnica independente, tal e como reclama a Unión Europea, xa que a levada a cabo polo Goberno (refírese a a CIAF, organismo que se define como independente e está adscrito ao Ministerio de Transportes) culpaba unicamente ao maquinista e non analizaba cáusalas raíz que afectan o seu ministerio, a Renfe e a Adif", engade. Tras a sentenza, para as vítimas, "resulta máis que obvio que a investigación da CIAF resulta infame e é imprescindible reabrila".

Sinalan directamente a Esther Mateo, "sobriña de Antonio González Marín, presidente que estaba á fronte de Adif cando se realizou a modificación do proxecto que rebaixou a seguridade e autorizou Pepe Blanco", para reprochar que "continúa como directora de seguridade a pesar de que a Unión Europea e a sentenza deixaron claro que a liña non era segura e que non se cumpriu a normativa". Mateo presentou unha peritaxe no xulgado "sinalando que a liña era segura, que cumpría a normativa de seguridade e que non hai curvas perigosas", reproban as vítimas.

Ademais, apuntan que Óscar Puente, como alcalde de Valladolid, "non só tivo unhas palabras de recordo para as vítimas, especialmente as valisoletanas, senón que ademais, aprobou en xuño 2016 unha moción de apoio" á plataforma para "instar o Goberno a constituír unha comisión de investigación composta por expertos e técnicos independentes acerca do ocorrido". "Un acto máis de hipocrisía", apostilan. E avisa de que o ministro "pasará á historia como o único que non recibiu ás vítimas da maior traxedia ferroviaria, non depurou responsabilidades políticas e mantivo de directora de seguridade en Adif a alguén que afirmou que non había curvas perigosas e fixo unha peritaxe afirmando que todo estaba ben en Angrois".