O Plan Inungal recomenda a un maior número de concellos ter un plan específico

O Diario Oficial de Galicia recolle hoxe a publicación do Plan especial de Protección Civil ante o risco de inundacións en Galicia (Inungal), que integra os novos estudos de risco, unha vez aprobados os plans de xestión de risco que elaboran os organismos de cunca. Entre outras cuestións, aumenta o número de concellos nos que se considera recomendable un plan específico.

Trátase da segunda revisión desde a súa aprobación en 2001 tras recibir o informe favorable do pleno da Comisión Galega de Protección Civil e da Comisión Permanente do Consello Nacional de Protección Civil.

A revisión foille tamén remitida á Federación Galega de Municipios e Provincias (Fegamp) para que dese traslado aos concellos co obxectivo de conseguir o máximo consenso posible.

Como novidades, actualízase a análise de riscos integrando os estudos de demarcacións hidrográficas; adáptase á nova norma básica de protección civil e actualízanse os datos das redes de alerta integrando o Modelo de Avaliación do Risco Local de Inundación.

Ademais, o estudo de risco conclúe que se reduce o número de concellos obrigados a elaborar e redactar o plan municipal para este risco, ao pasar de ser obrigatorio en 62 a 51. Pola contra, aumentan de 29 a 45 os casos nos que se considera recomendable.

Así, na provincia da Coruña hai 15 concellos con obrigatoriedade de ter plan e 22 nos que se recomenda. No caso de Lugo son nove con deber e outros nove con recomendación, e no de Ourense, 13 e dous, respectivamente. Pola súa banda, Pontevedra suma 14 municipios obrigados e 12 con recomendación.

Inundacións en Vigo | Fonte: Javier Vázquez