A ‘Festa da Ostra’ de Arcade, un exemplo de inclusión
O Concello de Soutomaior anuncia unha serie de medidas que demostran un total compromiso para facer que todas as persoas, sexa cal sexa a súa condición, poidan gozar da celebración desta fin de semana.
Por Galicia Confidencial | Soutomaior | 04/04/2025 | Actualizada ás 18:08
Baixo o programa “Soutomaior Inclusivo”, impulsado dende o equipo de Goberno, veñen de anunciar as medidas concretas que farán efectivas nesta edición da ‘Festa da Ostra’ de Arcade (4,5 e 6 de abril).
En todo momento, e a carón do dispositivo sanitario e de seguridade, haberá un ‘Punto de apoio permanente’ e ofreceranse ‘Cascos anti-ruído’ para uso de quen o requira na zona de recreativos e foguetes de artificio.
HORARIOS DE ATRACCIÓNS ‘SEN RUÍDO’ E COLA REDUCIDA
Haberá atraccións sen ruído o sábado 5 pola mañá de 12:00 a 13:00 h. e pola tarde de 18:00 a 19:00 h. E o domingo pola mañá de 13:00 a 14:00 h. e de tarde de 18:00 a 19:00 h.
E para rapazada con diversidade funcional terán preferencia á hora de acceder ás atraccións. Acreditarase esta condición cunha pulseira ‘Soutomaior inclusivo’ ou a tarxeta de discapacidade.
OUTRAS MEDIDAS
O Concello de Soutomaior habilitará tamén un aparcadoiro para persoas con mobilidade reducida, dispoñible durante toda a fin de semana a carón da rotonda de Ostreira; e tamén se contará cunha plataforma de visibilidade para persoas con mobilidade reducida na carpa principal para concertos e pregón. Pregón que, ademais, contará cun intérprete de signos.
PROGRAMA DE FIN DE SEMANA
O sábado 5 de abril ás 12:00 h. abrirán as casetas de degustación de ostras e viño na carpa principal.
A partir das 12:00 h. a música correrá a cargo de 'Brassica Rapa' no Peirao; e a partir das 22:00 h. verbena coas orquestras 'KUBO' e 'OLYMPUS'.
O domingo 6 ás 11:00 h. abrirán as casetas de degustación de ostras e viño. E a esa mesma hora chegará a música coa Banda Artística de Arcade e a Banda Cultural de Arcade. A partir das 12:00 h. actuará o grupo Fernando Sánchez Jazz Quartet.
Ás 13:00 h. lectura do pregón a cargo de Celso Fernández Sanmartín e ás 18:00 h. actuarán 'Festicultores Troupe' cun pasarrúas polo Peirao de Arcade.
