Sete días sen Adriana, a menor de Ordes desaparecida en Fisterra onde perderon o seu rastro
O último contacto da menor foi cunha amiga e até o de agora só se encontrou a súa mochila con documentación mais non o móbil
Por Europa Press / Redacción | SANTIAGO DE COMPOSTELA | 29/10/2024 | Actualizada ás 19:05
A procura de Adriana C.C., a menor de 14 anos de Ordes desaparecida hai xusto unha semana continuou este martes ao longo da costa de Fisterra, na que se perdeu o seu rastro, con patrullas de seguridade cidadá a pé, xa que, unha xornada máis, as condicións do mar non foron as adecuadas para que os mergulladores puidesen mergullarse.
Fontes da Garda Civil consultadas por Europa Press indicaron que, do mesmo xeito que o que ocorreu durante o fin de semana e este luns, os efectivos do Grupo de Actividades Subacuáticas (GEAS) desprazados ata a zona non puideron proceder á inmersión.
A procura continúa centrada na zona na que un veciño do municipio coruñés de Fisterra localizou este sábado a mochila da moza coa súa documentación na praia de Mar de Fóra. É o último indicio que se ten da menor, que o martes enviou a uns amiga vídeos nos que se podía ver esta parte da costa coruñesa.
Un amplo dispositivo, coordinado e posto en marcha pola Garda Civil (no que drones peitearon as zonas de cantil á que é difícil acceder a pé), busca desde a semana pasada á menor na zona de Fisterra, onde se localizou o último sinal do seu teléfono móbil, que non apareceu e está apagado desde hai días.
Desde esta localidade, ata a que chegaría en bus desde Santiago, a moza --cuxa desaparición denunciou a súa familia o martes-- mantería o último contacto cunha amiga.
