Sete millóns de páxinas preservadas 'online' para conservar a memoria dixital de Galicia

A Xunta conta actualmente con 7.043.671 páxinas preservadas procedentes de 268.224 obxectos dixitais, entendendo por obxectos desde números de prensa, ata documentos de foros medievais, mapas da idade moderna ou postais do século XIX, compostos moitos deles por varias páxinas.

Son datos que deu a coñecer este sábado a Consellería de Cultura con motivo da celebración do Día da Preservación Dixital, efeméride que recoñece e conciencia sobre o traballo a favor de asegurar que os materiais dixitalizados poidan ser usados polas xeracións futuras, protexendo os datos de maneira que non se vexan afectados as transformacións tecnolóxicas.

Neste sentido, o Goberno galego, consciente de que non se pode entender a cultura na actualidade sen esta parte que vai máis aló dos elementos físicos, leva anos avanzando nos mecanismos precisos que permitan garantir o acceso á creación cultural en formato electrónico a longo prazo.

Ordenador portátil | Fonte: Pixabay

Así, o departamento de Cultura da Administración autonómica está a desenvolver políticas que, ademais de permitir a consulta destes materiais, tamén velen pola súa conservación, seguridade e accesibilidade, levando a cabo as técnicas e procedementos necesarios para que perduren no tempo.

Fai falta destacar que as principais plataformas que xestionan o contido cultural galego dixitalizado ata o momento son Galiciana Arquivo Dixital de Galicia, o órgano que máis obxectos (118.460) e páxinas (5,5 millóns) ten preservadas actualmente, e Galiciana Biblioteca Dixital de Galicia, que achega 116.935 pezas que suman 1.037.720 imaxes.

Ademais, Galiciana Patrimonio Dixital de Galicia é a garantía para salvagardar de cara ao futuro os materiais patrimoniais transformados ao campo tecnolóxico por outras institucións relevantes para Galicia como o Museo do Pobo Galego, a Fundación Barrié ou a Biblioteca Xeral da Universidade de Santiago de Compostela. Destoutras entidades hai actualmente preservadas 428.741 imaxes dixitais pertencentes a 32.829 obxectos.