Falece un condutor ao saírse da vía nas Pontes e caer ao río
Cando os equipos de Emerxencias chegaron ao momento informaron da localización do corpo sen vida do condutor e único ocupante do vehículo, que estaba a flotar na auga.
Por Europa Press / Redacción | FERROL | 04/11/2024 | Actualizada ás 14:17
Un condutor faleceu este luns tras saírse da vía o coche no que circulaba no municipio das Pontes, segundo informou o CIAE 112 Galicia. Así, o 112 Galicia recibiu un aviso dun particular sobre as 11.00 horas que informaba de que acababa de ver un coche saírse da calzada e precipitarse a un río, no lugar de Pereiro, parroquia da Faeira.
O alertante indicaba que o coche non estaba mergullado na auga por completo, pero non podía ver se había alguén no seu interior. O CIAE deu aviso a Urxencias Sanitarias de Galicia-061, ao GES de Mugardos, aos bombeiros de Vilalba, á Garda Civil, Policía Local e Protección Civil das Pontes.
Cando os equipos de Emerxencias chegaron ao momento informaron da localización do corpo sen vida do condutor e único ocupante do vehículo, que estaba a flotar na auga. Ata alí desprazouse unha ambulancia de soporte vital básico do 061-Galicia, medicalizada cun equipo de Atención Primaria, pero só puido confirmar o falecemento.
