As vendas de coches dispáranse un 27 % en Galicia en outubro, 20 puntos por enriba da media estatal

Galicia rexistrou un total de 2.649 matriculacións de turismos novos en outubro, o que supón un repunte do 27 % respecto ao mesmo mes de 2023, segundo datos das asociacións de fabricantes (Anfac), concesionarios (Faconauto) e vendedores (Ganvam) publicados este luns. Este aumento é 20 puntos maior que a alza do 7,2 % na media española durante o décimo mes, cun total de 83.472 unidades. As vendas de Galicia supoñen o 3,2 % do total estatal.

No acumulado entre xaneiro e outubro, a comunidade galega anótase 22.529 coches novos vendidos, o que supón un 11,8 % máis que no mesmo período de 2023. O maior crecemento en Galicia prodúcese en outubro nos vehículos eléctricos e híbridos, con 1.548 unidades, o que se traduce nun incremento do 35 %. Nos dez primeiros meses do ano matriculáronse 12.825 deste tipo, un 27 % máis que no mesmo período de 2023. Tamén crecen, aínda que en menor medida as matriculacións de gasolina, con 855 en outubro (+17 %). No conxunto do ano elévanse un 1,8 %, con 7.447 unidades. Igualmente, soben as vendas de coches diésel ao alcanzar as 246 en outubro (+21,8 %). Iso si, entre xaneiro e outubro, prodúcese un esborralle do 17,8 % neste ámbito.

DATOS ESTATAIS

As matriculacións de turismos e todoterreos en España alcanzaron as 83.472 unidades en outubro, o que representa unha alza do 7,16 % respecto das 77.893 rexistradas no décimo mes de 2023, mentres que no que vai de ano soben un 4,9 %, segundo datos das asociacións de fabricantes (Anfac), concesionarios (Faconauto) e vendedores (Ganvam), publicados este luns. Así, nos dez meses que van de 2024, as matriculacións suman 828.162 unidades, fronte ás 789.276 unidades matriculadas no mesmo período do ano anterior.

Por canles, os clientes particulares adquiriron 41.436 turismos e todoterreos en outubro, un 8,7 % máis en termos interanuais, e 366.206 unidades no acumulado do ano, un 7,6 % máis, mentres que as empresas matricularon 36.164 unidades no décimo mes do ano (+6,5 %) e 299.446 no acumulado desde xaneiro (-7,9 %). Do seu lado, as firmas de 'rent a car' adquiriron 5.872 turismos e todoterreos no mercado nacional en outubro de 2024, o que supón un crecemento do 0,5 % en termos interanuais. Así mesmo, no acumulado de 2024 a cifra incrementouse un 31,1 %, ata as 162.510 unidades.

Doutra banda, o 'renting' matriculou en outubro 20.336 turismos, un 14,5 % máis en termos interanuais, mentres que nos dez meses que van de 2024 as matriculacións mediante esta modalidade creceron un 10,7 %, ata as 223.044 unidades. Ademais, as matriculacións de vehículos comerciais lixeiros alcanzaron en outubro as 15.362 unidades, o que supón un crecemento do 12,4 % respecto ao mesmo mes ano pasado, mentres que no acumulado do que vai de 2024 vendéronse 137.498 unidades, un 16,1 % máis que no mesmo período de 2023.

Concesionario de coches | Fonte: PEDRO DAVILA - Arquivo