Rueda teima e reclama as competencias en meteoroloxía sen "pór en dúbida" á Aemet

O presidente da Xunta, Alfonso Rueda, insistiu este luns na proposta de reclamar ao Estado as competencias sobre a meteoroloxía e as alertas vinculada á mesma, pero sen "pór en dúbida a capacidade técnica" dos traballadores da Axencia Estatal de Meteoroloxía (Aemet).

Así respondeu o mandatario autonómico ao ser preguntado sobre o anuncio realizado poucos días antes da catástrofe da DANA en Valencia polo conselleiro de Presidencia, Diego Calvo, polo cal a Xunta solicitará formalmente as citadas competencias para poder emitir avisos "máis concretos", un asunto que en Galicia leva xa anos encima da mesa.

Neste contexto, Rueda lembrou que as eventuais emerxencias provocadas polo tempo guíanse, tamén na Comunidade galega, polos niveis de alerta por cores --amarelo, laranxa e vermello-- que establece a Aemet en base ás súas previsións.

O presidente galego explicou que a reclamación deste traspaso faise "sempre buscando a máxima eficacia e rigor", porque a Xunta depende de dita clasificación por cores, aínda que requirirá unha mesa de transferencia desta competencia "moi técnica".

Ademais, Rueda negou que isto signifique pór "en dúbida a capacidade técnica" das persoas que traballan na Aemet e destacou o "servizo magnífico" que supón Meteogalicia, o organismo similar que depende da Xunta, "que ao final é a que ten nas súas dous primeiros niveis que activar todos os medios e reaccións fronte a unha situación de emerxencia".

PLANS LOCAIS CONTRA INUNDACIÓNS

Por outra banda, tamén a preguntas dos medios, o presidente galego lembrou que os concellos contan con "todo o asesoramento da Xunta" para elaborar os seus plans contra inundacións, que son obrigatorios nuns casos e recomendables noutros.

De feito, Rueda destacou que "uns están a cumprir" e estanos publicando; mentres que, sobre os restantes, espera que "nun futuro" o cumpran. En todo caso, apelou ás administracións locais a que estean "moi atentas" porque "ninguén está libre de situacións de emerxencias".

CONVENIO COLABORACIÓN UNIVERSIDADES

O Consello da Xunta deu este luns luz verde á firma dun convenio de colaboración entre a Consellería de Educación, Ciencia, Universidades e FP e as universidades de Santiago de Compostela (USC), de Vigo (UVigo) e da Coruña (UDC) para reforzar o seu equipamento científico e de innovación educativa con 9,3 millóns de euros.

En concreto, o Goberno galego destinará uns 3,9 millóns de euros á USC, así como 3 millóns á UVigo e preto de 2,4 millóns á UDC. O obxectivo é mellorar os recursos innovadores destinados aos estudos de grao e máster, polo que se adquirirán licenzas de software, simuladores ou equipos informáticos, entre outros.

Con este acordo tamén se creará por primeira vez unha plataforma para compartir o equipamento científico-técnico entre as universidades, o que na práctica traducirase "nun mellor aproveitamento de sinerxías para un maior impacto dos proxectos de innovación e investigación que desenvolvan", segundo indica a Xunta.

Noutra orde de cousas, a Xunta destinará uns 2,5 millóns de euros a unha nova edición do Bono Enerxía Peme, co obxectivo de que máis de 600 pemes e autónomos poidan mellorar as súas instalacións enerxéticas e reducir a factura da luz.