Anpas Galegas critica que Educación non faga un "estudo serio" sobre Edixgal
Por E.P. | SANTIAGO DE COMPOSTELA | 05/11/2024 | Actualizada ás 12:47
Anpas Galegas defendeu que a enquisa presentada a semana pasada sobre o programa Edixgal non é "unha mostra ao azar" e que permite "identificar patróns claros na valoración das familias" en relación con esta iniciativa, mentres criticou á Consellería de Educación que non realice "un estudo serio".
Nunha nota de prensa, insistiu en que se trata dun traballo "rigoroso" no que participaron preto de 4.000 nais e pais, dos que "case 1.600" contestaron á parte dedicada ao libro dixital. Así, denunciou que o conselleiro de Educación, Román Rodríguez, "despreza" o estudo e os seus resultados porque "di que a mostra non é representativa". Entenden as Anpas que o titular de Cultura "quere restarlle importancia subliñando que só contestaron o 3% das familias". "Este non é un argumento suficiente para non ter en conta esta contribución", reprocharon.
Neste contexto, Anpas Galegas recoñece que a mostra "non é estatisticamente representativa", xa que "non se empregou un procedemento ao azar para a súa selección", o que, na súa opinión, "non quere dicir que non teña valor científico e social e permita identificar un problema".
"Os estudos de enquisa con mostras non aleatorias son moi habituais, o que non o é tanto é polos en cuestión, sobre todo cando non hai outro estudo que soporte a crítica expresada", lamentou.
Neste contexto, a entidade cre que o "lamentable" non é a mostra da enquisa, senón que "despois de 10 anos a Consellería non fose capaz de facer un estudo evaluativo serio deste programa". "Anpas Galegas, a pesar das limitacións e trabas sistemáticas, está a facer o que a propia administración non asume", censurou.
