Galicia reclama a regulación da etiquetaxe de produtos do mar vexetais para evitar confusión cos de orixe animal
O conselleiro do Mar, Alfonso Villares, advirte de que a pesar de que existe un regulamento comunitario de Información Alimentaria, esa norma é "insuficiente" ante o uso de termos asociados aos produtos pesqueiros en alimentación vexetariana ou vegana.
Por Europa Press / Redacción | VIGO | 05/11/2024 | Actualizada ás 15:00
O conselleiro do Mar, Alfonso Villares, reclamou este martes ao Goberno central e á Comisión Europa a regulación dos produtos de orixe vexetal fronte a "etiquetaxes enganosos" cos de orixe animal. Así o sinalou na súa intervención na xornada 'Plant Based. Pespectivas e regulación', organizada pola Unión de Consumidores de Galicia en colaboración coa Confederación CONSUMES e Conxemar na sede do Centro Tecnolóxico do Mar, situada en Vigo.
Alí, Villares pediu que se poña fin ás "malas prácticas" na etiquetaxe destes produtos, que levan á confusión aos consumidores respecto dos que son de orixe animal. Para el, a pesar de que existe un regulamento comunitario de Información Alimentaria, esa norma é "insuficiente" ante o uso de termos asociados aos produtos pesqueiros en alimentación vexetariana ou vegana.
Por iso, manifestou o seu apoio ás reivindicacións de organizacións representativas do sector, dado os "prexuízos" que xera en termos comerciais e socioeconómicos esta situación. Ademais, o conselleiro aproveitou para destacar as "excepcionais calidades nutricionais" dos alimentos mariños, polo seu alto contido en ácidos grasos omega 3, entre outros nutrientes, "sendo a súa presenza na dieta sinónimo de saúde e benestar".
