O Consello da Cultura Galega creará un foro participativo tras unha reunión sobre lingua coa Xunta
"A situación é preocupante, polo que isto ten que estar fose do debate, ten que ser unha operación de país na que as disputas doutro tipo queden enterradas durante un tempo para actuar todos a un tempo en positivo", defendeu a presidenta do Consello da Cultura Galega, Rosario Álvarez
Por Europa Press / Redacción | SANTIAGO DE COMPOSTELA | 08/11/2024 | Actualizada ás 14:44
O conselleiro de Cultura, Lingua e Xuventude, José López Campos, destacou os programas de voluntariado lingüístico ou a actualización do Plan Xeral de Normalización Lingüístico entre as medidas propostas para fomentar o uso do galego na sociedade. Así mesmo, a presidenta do Consello da Cultura Galega, Rosario Álvarez, anunciou a posta en marcha dun foro participativo en materia de lingua para 2025.
Así o defenderon tras reunirse este venres en Santiago para pór en común cal é a situación actual do uso da lingua e que iniciativas desenvolver para fomentalo.
Deste xeito, Álvarez anunciou que de face a 2025 a institución que preside contempla a posta en marcha dun foro participativo no que, "a partir da detección dunha serie de liñas de información e debate", poidan consultar con axentes sociais distintos aspectos e mesmo "chegar a un acordo propositivo".
"A situación é preocupante, polo que isto ten que estar fose do debate, ten que ser unha operación de país na que as disputas doutro tipo queden enterradas durante un tempo para actuar todos a un tempo en positivo", defendeu a presidenta do Consello da Cultura Galega.
Neste sentido, o conselleiro da Lingua subliñou que hai moita información e "documentos referentes" como a Carta Europea das Linguas, a última enquisa do IGE ou outros datos achegados polo propio Consello da Cultura Galega e a Real Academia Galega que ofrecen un escenario para "empezar a tomar decisións".
O encontro celebrado este venres na sede do Consello da Cultura Galega en Santiago, enmárcase dentro da rolda de reunións que está a manter o conselleiro cos grupos parlamentarios e diversas institucións en torno ao Pacto pola Lingua, unha iniciativa que expón varios eixos de actuación.
INICIATIVAS
Entre estas actuacións López Campos destacou a actualización do Plan Xeral de Normalización Lingüística, medidas vinculadas co uso do galego na contorna da Igrexa que se anunciarán nas próximas semanas, para o neofalantismo ou un plan de 50 medidas para fomentar o idioma en diversos ámbitos.
Así mesmo, o responsable de Lingua incidiu na actualización do Plan, no "papel que ten que xogar" a CRTVG a través das súas distintas plataformas ou no incremento da partida destinada a accións de dinamización da lingua nos orzamentos de 2025.
Con todo, lembrou que en 2025 poranse en marcha máis de 100 cursos de cultura e lingua galegas para persoas non nadas en Galicia, ademais deses grupos de voluntariado para organizar conversacións e propostas de traballo colaborativo coas asociacións de distintas comunidades asentadas no territorio galego.
