Unha muller morta e cinco feridos no incendio dunha vivenda no Grove
Un dos feridos tivo que ser rescatado con escaleiras polo balcón.
Por Europa Press / Redacción | VIGO | 13/11/2024 | Actualizada ás 10:09
Unha muller faleceu na noite deste pasado martes na localidade pontevedresa do Grove tras rexistrarse un incendio na súa vivenda, mentres que outras cinco persoas resultaron feridas por inhalación de fume.
Tal como informa o 112 Galicia, os feitos ocorreron sobre as 23.20 horas e, no momento do lume, había dúas persoas no interior da vivenda. Precisamente un home, que estaba no piso superior, alertou aos servizos de emerxencia, mentres que a muller, que resultou falecida, estaba na planta baixa, onde comezou o incendio. Durante a chamada, o home indicou que el conseguira saír ao balcón.
Por todo iso, os xestores de emerxencias solicitaron a colaboración de Urxencias Sanitarias de Galicia-061, dos Bombeiros do Salnés, do GES e de Protección Civil do Grove, do Servizo de Emerxencias de Sanxenxo e da Garda Civil. Ademais, tamén se deu aviso aos profesionais do Grupo de Intervención Psicolóxica en Catástrofes e Emerxencias (GIPCE), do Colexio Oficial de Psicoloxía de Galicia, por se fose necesaria a súa intervención.
Sobre medianoite deuse por apagado o lume, que queimou un salón completo e que se orixinou nun sofá, confirmándose o falecemento dunha muller, que foi localizada na mesma estancia.
Os servizos de emerxencias rescataron ao home cunha escaleira a través do balcón, J.N.M. de 73 anos de idade, que foi trasladado ao hospital Montecelo, segundo fontes do 061. Así mesmo, outras catro persoas que trataron de entrar á vivenda para axudar resultaron afectadas pola inhalación de fume.
