Galicia e Arxentina asinan un acordo para que as súas universidades poidan impartir títulos compartidos

As universidades públicas galegas e as universidades arxentinas poderán impartir titulacións conxuntas de grao, máster e doutoramento. Farao posible un acordo marco asinado entre ambos os territorios, primeiro froito da viaxe de traballo a este país que encabeza o conselleiro de Educación, Román Rodríguez.

O representante da Xunta de Galicia presidiu ao acto de firma entre a Axencia para a Calidade do Sistema Universitario de Galicia (ACSUG) e a Comisión Nacional de Avaliación e Acreditación Universitaria (CONEAU). Esta decisión, impulsada desde o Goberno galego co consenso das universidades galegas e a supervisión das axencias de calidade de ambos os sistemas, promoverá tamén o intercambio de experiencias, metodoloxías e ferramentas entre os sistemas de educación superior a ambos os dous lados do Atlántico.

"A Xunta e as universidades públicas galegas coincidimos no obxectivo de estar máis abertos ao exterior e ser máis internacionais", dixo o conselleiro, que considerou un bo arranque este acordo para que "os alumnos arxentinos poidan formarse en Galicia e tamén para que a Comunidade poida enriquecerse co seu talento".

Román Rodríguez puxo en valor a disposición das tres universidades públicas galegas para sumarse a esta iniciativa. De feito, xa están a analizar a oferta académica para poder definir as primeiras titulacións nas que desenvolver esta colaboración.

Galicia e Arxentina asinan un acordo para que as súas universidades poidan impartir títulos compartidos. XUNTA | Fonte: Europa Press