Liberado un home atrapado tras sufrir un accidente co seu tractor na Peroxa
O servizo de emerxencias tamén pediu a intervención dos bombeiros do Carballiño, do GES de Pereiro e dos axentes da Garda Civil
Por E.P. | OURENSE | 13/11/2024 | Actualizada ás 19:56
Un home tivo que ser atendido por efectivos sanitarios na Peroxa ao sufrir un accidente co tractor que conducía. De feito, quedou atrapado debaixo do mesmo e tivo que ser liberado, aínda que, segundo informou o 112, non sufriu feridas graves.
Foi sobre as 14.45 horas deste mércores cando o servizo de emerxencias recibiu a chamada da muller do ferido, que alertaba do accidente producido no lugar A Pedreira, pertencente á parroquia de Carracedo, na Peroxa.
Segundo indicaba a muller, o home quedara atrapado baixo o tractor tras envorcar o vehículo, aínda que trasladaba que o condutor se atopaba ben.
O 112 deu aviso a Urxencias Sanitarias de Galicia-061, que nun primeiro momento decidiu mobilizar ao helicóptero medicalizado, aínda que finalmente o seu traslado non foi necesario, xa que o home foi liberado coa axuda do persoal sanitario e duns veciños da zona e atendido no punto.
O servizo de emerxencias tamén pediu a intervención dos bombeiros do Carballiño, do GES de Pereiro e dos axentes da Garda Civil.
