Tanxugueiras e Fillas de Cassandra encabezan o cartel da terceira edición do festival EmigraSON de Bruxelas

Tanxugueiras e Fillas de Cassandra serán as cabezas de cartel da terceira edición do festival EmigraSON, que se celebra en Bruxelas da man de mozos emigrantes e que "se consolida como punto de encontro para bandas, emigrantes e amantes da música de Galicia". A cita terá lugar na capital belga o próximo 22 de febreiro de 2025 e, ademais das artistas citadas, alí estarán tamén Terbutalina e De Ninghures. Segundo explica a organización nun comunicado, o éxito das edicións anteriores levoulles a triplicar o aforamento da sala. Esperan acoller a unhas 1.300 persoas na sala La Madeleine. As entradas sairán á venda este venres 22 de novembro. 

A iniciativa organízaa un grupo de mozos emigrados en Bélxica e busca "brindar un espazo de intercambio cultural á comunidade galega que vive no estranxeiro, ademais de visibilizar e dar a coñecer o talento galego no ámbito internacional". Destacan ademais que para esta edición, o EmigraSON conta co apoio da Xunta de Galicia, Deleite, Deputación de Pontevedra, Fundación Galicia Europa, Embaixada de España e dos eurodeputados Nicolás González Casares, Ana Miranda e Francisco Millán Mon.