Detido en Cambados un veciño dun inmoble frecuentado por consumidores de drogas tras tentar acceder ao interior dun colexio

Un veciño de Cambados foi detido este luns por axentes da Garda Civil cando estaba forcexeando con efectivos da Policía Local, que trataban de impedir que accedese a un colexio do municipio. Segundo informaron fontes da Comandancia, o incidente tivo lugar á primeira hora da mañá cando un individuo, veciño dun inmoble frecuentado por persoas consumidoras de estupefacientes, saíu á rúa gritando, "fóra de si" e pronunciando frases sen sentido. Nun momento determinado, dirixiuse ao colexio de Corvillón e o director do centro alertou á Policía para impedir que entrase.

Cando chegaron os axentes, o home resistiuse e empolicouse ao enreixado de entrada do centro. No forcexeo, cando un dos policías locais o agarraba por detrás, ambos caeron ao chan e o axente sufriu unha fractura nunha perna. Tras uns momentos de tensión, e con axuda de profesores e pais, o home foi reducido, aínda que non deixou de patalear e tamén lesionou ao outro policía. Finalmente, acabou detido pola Garda Civil, que o investiga por un suposto delito de atentado contra axentes da autoridade. O home foi trasladado a un centro hospitalario, onde quedou ingresado.