O Comité Intercentros da CRTVG convoca para o 30 de novembro a manifestación polos medios públicos galegos
O mesmo Comité emitiu un comunicado onde sinalan tamén que levarán a cabo novos paros que arrincarán esa mesmo fin de semana
Por Europa Press / Redacción | SANTIAGO DE COMPOSTELA | 18/11/2024 | Actualizada ás 16:37
O Comité Intercentros da CRTVG informou de que a manifestación en defensa dos medios públicos que, inicialmente convocaran para o domingo 1 de decembro, terá lugar finalmente o sábado 30 de novembro.
Así o comunicaron este luns, 19ª xornada de paro na CRTVG, sinalando que o cambio responde a "facilitar a asistencia" á concentración, prevista para as 12.00 horas en Santiago, con saída na Praza Vermella e final en Pratarías.
No comunicado sinalan tamén que levarán a cabo novos paros que arrincarán ese mesmo fin de semana. O primeiro será o sábado 30 de novembro, de 8.00 a 15.30 horas, coincidindo coa manifestación. O segundo terá lugar o domingo, 1 de decembro, en horario de tarde, desde as 16.30 horas ata medianoite.
Durante o mes de decembro, os paros manteranse en días alternos: luns, mércores e venres, arrincando 15 minutos antes (desde as 11.15 ata as 13.45 horas); ata o venres 13 de decembro.
Será este día cando, destacan, "aumentará a presión" coa convocatoria dunha folga de 24 horas, que afectará a todas as quendas.
"A partir desa data, na que finaliza a emisión dos 65 programas contratados por 1.040.000 euros, a folga quedará en suspenso ata que a dirección da CRTVG decida que fai coa produción externa", indican.
Con todo, confían na "posibilidade" de establecer un diálogo que permita "atopar unha solución e arrincar o 2025 coa desconvocatoria do conflito".
