O BNG acusa á TVG de emitir "bulos" e o ente público ten que rectificar
Emitiu unha peza na que apuntaba que o BNG non asistiu ao acto da Fundación Castelao en Compostela e recolleu as críticas da Xunta ao BNG por organizar un acto "paralelo".
Por Europa Press / Redacción | SANTIAGO DE COMPOSTELA | 10/01/2025 | Actualizada ás 20:00
A Corporación Radio Televisión de Galicia rectificou publicamente a través das redes sociais, aínda non o fixo nun telexornal, por afirmar nun informativo da TVG emitido este venres que o BNG non enviara representación ao acto organizado o pasado martes pola Fundación Castelao con motivo do 75 aniversario do falecemento do político e intelectual rianxeiro.
A peza, incluída no Telexornal Mediodía deste venres e incrustada entre o parte meteorolóxico e a información deportivo, iníciase cunha locución do presentador na que asegura que o BNG "non estivo" no acto do pasado luns no Panteón dos Galegos Ilustres, ao que asistiron, entre outros cargos da organización nacionalista, a súa viceportavoz parlamentaria, Olalla Rodil, e a alcaldesa de Santiago, Goretti Sanmartín.
A entradilla do presentador do informativo da televisión pública galega dá paso a unhas declaracións do conselleiro de Cultura, José López Campos, nas que critica ao Bloque por organizar "un acto paralelo" en Pontevedra en honra ao intelectual morto no exilio en 1950.
BULO
A emisión deste contido provocou a reacción da formación nacionalista, que remitiu este venres unha carta dirixida ao director xeral da corporación, Alfonso Sánchez Izquierdo, na que demanda unha rectificación "inmediata" por tratarse dun "bulo" e unha "groseira manipulación" da que ven "cómplice" ao conselleiro de Cultura. "É obvio que o que se di é total e absolutamente mentira e a CRTVG sábeo ou debería sabelo porque cubriu ese acto tendo imaxes nas que poden verse as persoas que asistiron en representación do Bloque Nacionalista Galego", sinala a misiva da formación frontista asinada por Olalla Rodil.
A propia Rodil lembra que ela mesma estivo no acto xunto á alcaldesa de Santiago e membro da Executiva nacional do BNG, así como a deputada da Deputación de Lugo, Iria Castro, a súa homóloga na Deputación da Coruña, Natividade González, ou a tenente de alcaldesa na capital galega, Miriam Louzao.
Cualifica de "inadmisible" e "indigno" a emisión deste contido que incorre na difusión "dunha mentira dando por certas de maneira absolutamente acrítica as declaracións do conselleiro" e "deixa en evidencia unha vez máis" o "grao de manipulación" que aprecian nos medios públicos "postos ao servizo dos intereses" do PP.
RECTIFICACIÓN
Uns 20 minutos despois do traslado aos medios de comunicación do envío desta queixa por parte do BNG, a conta da CRTVG na rede social 'X' publicou unha mensaxe no que rectifica o contido da peza emitida horas antes no Telexornal.
"A CRTVG fíxose eco hoxe da controversia pola existencia de dous actos polo 75º aniversario do falecemento de Castelao, celebrados o mesmo día. Na introdución desta noticia no noso Telexornal Mediodía díxose que non asistiran representantes do BNG a un deses actos, o da Fundación Castelao", sinala en primeiro lugar a mensaxe da conta do ente público.
A continuación, recoñece que ese "dato" é "evidentemente un erro", dado que "na propia información" emitida o día 7 de xaneiro da cobertura do acto celebrado en Santiago a TVG "ofreceu varios planos" de Olalla Rodil e de Goretti Sanmartín durante a súa celebración.
