Dimite o coordinador de Cultura do PPdeG, Daniel Chapela, con críticas de "incompetencia" ao conselleiro López Campos

O coordinador da Comisión de Cultura do PPdeG, Daniel Chapela, anunciou este martes a súa dimisión e a súa baixa do partido con críticas ao "equipo claramente incompetente" do conselleiro de Cultura, José López Campos, especialmente en política lingüística e nas negociacións para alcanzar un pacto polo galego.

Chapela é tamén concelleiro do PP en Bueu desde o ano pasado, pero xa confirma que non deixará a acta, senón que se manterá na Corporación como edil non adscrito despois de meses de desavinzas coa súa p ortavoz municipal, Elena Estévez. Así o explica nun comunicado, avanzado por Europa Press, no que o responsable de Cultura do PPdeG, que se define a si mesmo como "conservador" e "manifestamente galeguista", critica os "diferentes cambios" que sufriu a Consellería do seu mesmo ámbito.

E é que o presidente da Xunta, Alfonso Rueda, unha vez reelixido o pasado abril, outorgou a José López Campos a carteira de Cultura (xunto con Lingua e Xuventude) que antes compartía departamento con Educación, a cargo de Román Rodríguez. Esta substitución, para Chapela, supuxo a "chegada dun novo equipo claramente incompetente" para xestionar, "especialmente para tratar a área de Lingua", o cal considera "un alicerce" tanto para Galicia como para el mesmo.

De feito, refírese a declaracións dos últimos días do conselleiro respecto diso do pacto político e social polo galego "que constitúen unha evidencia máis da incapacidade para xestionar un futuro para a lingua nun momento no que as mensaxes esperanzadoras deben ser o eixo fundamental" e sen "balóns fóra". Chapela foi nomeado coordinador da Comisión de Cultura con 22 anos, en 2022, cando Rueda chegou á Presidencia do PPdeG tras o salto de Alberto Núñez Feijóo á política estatal. Por tanto, tamén forma parte do Comité Executivo do partido.

"DIFERENZAS" COA PORTAVOZ EN BUEU

A este "lóxico descontento" co funcionamento do partido e a Consellería súmanselle as súas "diferenzas" coa portavoz municipal en Bueu. Todo comezou cando, no pleno de xullo, se abordou un proxecto en rúa Nova de Arriba que supuña a desaparición do aparcadoiro de coches do centro de Beluso para pasar a ser unha zona verde. "Unha promesa adquirida na campaña fora a de opornos a ese peche", relata o concelleiro, quen critica que, "minutos antes do pleno", Estévez ordenou a abstención. Con todo, Chapela decidiu romper a disciplina de voto e facelo en contra por "lealdade á palabra dada aos veciños", que para el é "o máis importante".

Por iso, tal e como desvela no comunicado, a portavoz iniciou un expediente sancionador que, finalmente, non chegou a termo. Pero Chapela "non cre nesa maneira de facer política", senón na que concibe esta actividade como "unha ferramenta" e "un medio para solucionar os problemas da xente". No seu caso, desde unha opción "conservadora e manifestamente galeguista". "É por iso que non podo soster unha oposición que non achega nada, que se limita a asistir a actos sen facer propostas de verdade, pois moitos dos meus compañeiros trasladan ideas de calidade que, despois, quedan sempre freados", continúa.

Chapela leva "desde o mes de xullo" meditando sobre os pasos a dar e "sobre o que se pode construír desde dentro" do partido. Con todo, cre que "non é posible articular nada máis" nin "falar con quen non quere escoitar e con quen non ten un proxecto municipal debaixo do brazo". "Para min, a política non é figurar nas fotos, senón construír", engade. Por todo iso, Chapela decidiu non só renunciar á coordinación de Cultura do PPdeG, senón tamén a darse de baixa como militante. Iso si, manterase como concelleiro non adscrito no Concello de Bueu para "defender os compromisos" adquiridos na campaña e "debéndose, exclusivamente, á veciñanza".

O PPDEG, "SORPRENDIDO" PORQUE NUNCA MANIFESTARA "DISCREPANCIAS"

O PP de Galicia móstrase "sorprendido" pola dimisión do coordinador da súa Comisión de Cultura, Daniel Chapela, porque "ata hoxe mesmo" nunca manifestara "ningunha discrepancia" coa liña do partido en cultura e política lingüística. Así o trasladan fontes da formación consultadas por Europa Press, sobre a marcha de Chapela anunciada este mesmo martes entre críticas cara ao "equipo claramente incompetente" do conselleiro de Cultura, Lingua e Xuventude, José López Campos. O PPdeG di "respectar" a súa saída, pero asegura que o tamén concelleiro en Bueu, que manterá a acta como non adscrito, nunca mostrara "ningunha discrepancia".

O PSDEG VE ISTO "UN BO EXEMPLO" DA "RELACIÓN TÓXICA" DO PP CO GALEGO

A deputada do PSdeG Silvia Longueira considera que a dimisión do coordinador da Comisión de Cultura do PPdeG, Daniel Chapela, é "un bo exemplo" da "relación tóxica" dos populares co idioma galego. A través dun comunicado, a portavoz de Cultura e Lingua do Grupo Socialista no Parlamento autonómico sinalou a "falta de entendemento e de rumbo" respecto da política lingüística "dentro" das filas populares.

Constitúe, en palabras de Longueira, "unha mostra dos moitos concelleiros e alcaldes do PP que están en contra da política lingüística que executou" a Xunta "durante estes 15 anos". De feito, a socialista destaca que esta dimisión se produce dous días despois da "masiva" manifestación do pasado domingo, convocada pola Plataforma Queremos Galego, para reclamar "un compromiso real coa lingua" á Xunta.