Conduce en sentido contrario polo centro urbano de Rianxo cuadriplicando a taxa de alcoholemia

A Policía Local de Rianxo interceptou ao condutor dun turismo que circulaba en sentido contrario e que, tras realizarlle a proba de alcoholemia, cuadriplicou a taxa permitida. Segundo informou a policía, sobre as 22.00 horas do domingo recibiron un aviso de que un vehículo realizaba unha traxectoria irregular no centro urbano. Nesa comunicación sinalábase que tamén estivera parado nun carril de circulación dunha rúa sen causa aparente, obstaculizando o tráfico.

Unha vez localizado no lugar do Pazo, os axentes observaron que invadía o sentido contrario de circulación e procederon á identificación do condutor, que presentaba síntomas de inxerir bebidas alcohólicas, polo que foi sometido ás probas de alcoholemia arroxando taxas constitutivas de delito. Así, procedeuse á súa investigación e foi citado para un xuízo rápido por un presunto delito contra a seguridade do tráfico.

Resultado proba alcoholemia realizada pola Policía Local de Rianxo a un condutor | Fonte: POLICÍA LOCAL RIANXO