O socialista Miguel Ángel Sotuela deixa a Alcaldía de Ribas de Sil por xubilación

O socialista Miguel Ángel Sotuela oficializa no pleno que se celebra na tarde deste xoves a súa renuncia á Alcaldía do municipio lucense de Ribas de Sil tras 26 anos no cargo. "Chegou o punto e final, toca retirarse", explicou en declaracións a Europa Press o rexedor, que considerou que "é hora de que novos bríos alaguen" o Concello. E é que, segundo destaca, despois de 26 anos no cargo "hai demasiada xente" que xa só "o lembra" na Alcaldía.

Deste xeito, explica que, con 64 anos de idade, pasará á xubilación tendo en conta que traballou "bastantes anos na lousa" e ten o coeficiente reductor para poder pasar a esta condición. Xunto a el, detallou que tamén deixa o cargo polos mesmos motivos o edil de Obras, Luís Rodríguez, quen estivo ao seu lado durante estes 26 anos na corporación municipal.

Deste xeito, unha vez oficializada a renuncia ao cargo na tarde deste xoves, terá que volverse celebrar outro pleno no que tomen posesión os dous novos concelleiros para, despois, proceder á elección do novo rexedor. Segundo explicou, prevese unha substitución "totalmente tranquila", no que asuma estas responsabilidades o actual tenente de alcalde Roberto Castro, quen actualmente ostenta a xerencia do Xeoparque Montañas do Courel.

Miguel Ángel Sotuela, alcalde de Ribas de Sil | Fonte: Arquivo