Pontón reivindica a unidade do nacionalismo, que fai que o BNG estea "en condicións de liderar Galicia"

A portavoz nacional do BNG, Ana Pontón, participou este sábado na conmemoración do 50 aniversario da Asemblea Nacional Popular Galega (AN-PG), desde onde reivindicou a autoorganización e a unidade do nacionalismo. Grazas a iso, dixo, agora o BNG está "en condicións de liderar Galicia". 

Pontón sinalou que o que é o Bloque é "resultado do esforzo e do compromiso dunha xeración que, en tempos de ditadura, teceu unha rede de organizacións nacionalistas" que fixo da AN-PG unha "referencia esencial" na evolución do movemento. Iso si, a líder do BNG diferenciou entre "nacións dependentes" e "colonizadas", o que determina modelos organizativos distintos. "A nosa historia demostra que proxectos nacionalistas de ideoloxías segmentadas por clase social non foron viables en Galicia", asegurou, para sinalar o fracaso de iniciativas que non respondían á "realidade" do país.

Neste acto de conmemoración convocado no Hotel Porta do Camiño de Santiago pola Fundación Galiza Sempre, promovida polo BNG en 1999, a portavoz nacional destacou o papel da AN-PG na consolidación da unidade do nacionalismo e da estratexia dunha "fronte ampla" que integre a todas as persoas nacionalistas, independentemente da súa ideoloxía. Neste sentido, Ana Pontón avogou por facer do Bloque unha forza social e política "imparable", tras o que se referiu a as loitas actuais do nacionalismo, como o 'non' ao proxecto de Altri en Palas de Rei. Disto serviuse para denunciar que o PP goberna "en contra de Galicia" e "obsesionado co BNG".