Ana Pontón, probábel nova líder do BNG
O Consello Nacional do Bloque aprobou este sábado a lista para a súa renovación. Como resultado, o máis probábel é que a deputada no Parlamento de Galicia Ana Pontón sexa a primeira muller que exerza como voceira nacional do BNG.
Por Galicia Confidencial | Santiago de Compostela | 20/02/2016 | Actualizada ás 16:03
A lista coloca a Goretti San Martín como número dous. San Martín é a vicepresidenta da deputación da Coruña e a actual responsábel da Executiva no referido a política local.
As dúas citadas dirixentes son militantes da Unión do Pobo Galego (UPG), o histórico partido nacionalista e comunista que participou na creación do Bloque.
Aínda que será a próxima Asemblea Nacional Extraordinaria quen aprobará ou modificará definitivamente esta proposta, o máis probábel é que reciba luz verde. A UPG é o partido máis numeroso e activo entre a militancia da fronte, polo que non debera ter problema en sacar adiante esta candidatura.
A elección implica un significativo cambio na estratexia do BNG, pois até hoxe o cargo de voceiro nacional nunca estivera ocupado por un militante da UPG. Incluso cando o elixido era moi próximo a este partido -caso de Guillerme Vázquez, formalmente non militaba na Unión do Pobo Galego.
Ana Belén Pontón Mondelo naceu en Sarria en 1977. Na actualidade forma parte da Executiva como responsábel da Secretaría de Políticas para a Mocidade. Dende 2012 é a voceira do BNG no Parlamento de Galicia.
Aínda non está confirmado se Pontón aspirará tamén a ser cabeza de cartel ás eleccóns ao Parlamento e polo tanto á presidencia da Xunta de Galicia.
