Altri e o PPdeG defenden o proxecto industrial en Palas tras a multitudinaria manifestación en Santiago
A multinacional portuguesa lembra que a Comisión Europea aproba o proxecto.
Por Europa Press / Redacción | SANTIAGO DE COMPOSTELA | 15/12/2024 | Actualizada ás 18:28
Greenfiber, do grupo portugués Altri, lamentou que "unha parte da sociedade" teña unha "percepción negativa" do proxecto que quere instalar en Palas de Rei e defendeu a súa "sustentabilidade".
Así o fixo nun comunicado en contestación á multitudinaria manifestación que este domingo acolleu Santiago de Compostela para "rexeitar radicalmente" a fábrica. "Trátase dun proxecto que foi deseñado cos máis altos criterios de sustentabilidade, circularidad e respecto ao medio ambiente, marcados pola normativa europea", asegurou Greenfiber.
Desta forma, indicou que a Comisión Europea "non rexistrou" proba algunha do "incumprimento" da normativa aplicable ao proxecto e mostráronse dispostos a "seguir explicando" o proxecto ás entidades e colectivos que "desexen informarse".
PPdeG
Tamén a secretaria xeral do PPdeG, Paula Prado, afirmou que o seu partido "seguirá traballando" para que en Galicia haxa industria e emprego e todo iso sexa "respectando o medio ambiente"
"En Santiago houbo esta mañá unha manifestación organizada, fundamentalmente, polo BNG que está instalado no pasado, e que non queren o progreso de Galicia, non queren industria e emprego", asegurou. Ante isto defendeu a postura dos populares galegos que "seguirán traballando" para que "haxa industria sempre respectando o medio ambiente".
Neste sentido, insistiu en que o seu partido "non vai deixar en ningún caso" que se produza unha instalación "que non cumpra" coa normativa nin co medio ambiente. "Nunca imos apostar por unha industria que prexudique a Galicia", asegurou.
