O BNG avanza o 'non' aos orzamentos ao non recoller ningunha das súas propostas: "Recollen as do PP, que aínda os empeoran máis"

A portavoz nacional do BNG, Ana Pontón, criticou que os orzamentos da Xunta pasarán este martes polo pleno o Parlamento galego "sen recoller nin unha soa proposta do principal grupo da oposición" e lamentou que estas "non son as contas que Galicia necesita", polo que advertiu de que "non poden contar co apoio do BNG". Así o destacou este luns ante as preguntas dos medios nunha rolda de prensa na que tamén afeou que estas contas "recollan modificacións do PP que aínda as empeoran máis". Nesta liña, asegurou que estas serven para "porse ao servizo do espolio eléctrico" e para "porlle unha alfombra vermella ás eléctricas".

"É evidente que son unhas contas públicas que non van nin a mellorar a Sanidade nin a dar resposta aos problemas de vivenda da xente nova nin tampouco debuxan un proxecto de futuro e, por tanto, non son as contas que Galicia necesita", Así mesmo, fixo fincapé en que non contarán co apoio do BNG porque significaría "seguir camiñando cara atrás" e reivindicou que o que se "necesita" é un "novo proxecto que impulse un cambio de rumbo". "O que vemos é un PP sen ideas, sen proxectos, na rutina e que, ademais, goberna desde a prepotencia de non ser capaz de aceptar nin unha soa das propostas que facemos desde o BNG", aseverou.

Por outra banda, tamén ante as preguntas dos medios, a portavoz nacional do BNG valorou a última enquisa elaborada por Sondaxe e sinalou que "o que pode ter máis relevancia é saber cales son as tendencias de fondo". "Nesa enquisa, para min, o dato máis relevante é que a única forza política que sobe é o BNG, o resto de forzas políticas, incluído o PP, baixan, e isto confirma que o BNG segue en forma", indicou.

CC.OO. AVISA DUNS ORZAMENTOS SON "INSUFICIENTES" PARA CREAR EMPREGO

Pola súa banda, CC.OO. avisa de que o PP vai aprobar esta semana uns orzamentos da Xunta para 2025 "insuficientes" para a creación de emprego na comunidade galega. A través dun comunicado de prensa, o sindicato reprocha ao Goberno galego a súa aposta por "unha rede clientelar de polos de emprendemento" que "só serve para subvencionar unha rede de falsas entidades de iniciativa social". Tras un estudo "detallado" das contas, CC.OO. extrae como "principal conclusión" que son "insuficientes" para dar resposta "ao principal problema dos galegos, que é ter un emprego que lles permita unha vida digna".

A secretaria de Emprego de CC.OO., Maica Bouza, critica que a Xunta "segue apostando polas rebaixas fiscais", de modo que "Galicia perderá 751 millóns de euros debido a estes beneficios fiscais". En canto ao gasto social, lamenta que "boa parte" destas políticas crecen "por baixo" do 4,4 %, como educación (+3,7%) e emprego, que "se reduce drasticamente" (-0,9 %). Por outra banda, considera que os orzamentos "plasman en materia de emprego a renuncia da Xunta a exercer as súas competencias nesta materia e a renuncia ao seu papel como servizo público a favor dunha rede clientelar de polos de emprendemento".

Dita rede, incide, "desatende a busca de emprego por conta allea e só serve para subvencionar a falsas entidades de iniciativa social que esconden tras de si a empresas con claros intereses económicos". Tamén asegura CC.OO. que o orzamento do próximo ano "non mellora a atención ás persoas", por dependentes e perceptores da renda de integración social (Risga), así como a quen reciben pensións non contributivas. Por último, ve que non hai "nin rastro de política industrial nin de políticas de apoio aos restantes sectores produtivos".