O futuro do galego: Rueda disposto a facer "cambios" en educación pero non unha "inmersión" lingüística
"Non estou de acordo coa inmersión, nin desde o punto persoal, en ningún dos idiomas", di sobre a derogación do decreto do bilingüismio.
- A situación do galego ao borde do "colapso": 34.000 nenos galegofalantes fronte a 180.000 castelanfalantes
- Ofensiva da RAG para tentar salvar o galego: piden con urxencia modificar o decreto do plurilingüismo de Feijóo
Por Europa Press / Redacción | SANTIAGO DE COMPOSTELA | 16/12/2024 | Actualizada ás 20:45
O presidente da Xunta, Alfonso Rueda, asegurou este luns que o seu goberno está "a disposición de falar e facer cambios" no ámbito educativo en relación á lingua, aínda que coa "liña vermella" de "non permitir a inmersión".
Así respondeu, en declaracións aos medios, ao ser preguntado sobre a declaración institucional da última sesión plenaria da Real Academia Galega, na que se apunta á responsabilidade da Xunta na perda de falantes novos do idioma galego. Sen "intención de polemizar" coa RAG, Alfonso Rueda asegurou que, na súa opinión, "a escola non é un problema" se non "unha solución" á perda de falantes do galego, algo no que a Xunta busca "incidir".
Por iso, expresou a "disposición" do Goberno galego de "falar de facer cambios" neste ámbito, aínda que coa "liña vermella de non permitir a inmersión", que considera "unha opción política dun partido", o BNG, coa que dixo "non estar de acordo".
"Non estou de acordo coa inmersión, nin desde o punto persoal, en ningún dos idiomas, nin, desde logo, desde o punto de vista de responsabilidades de Goberno. Por tanto, estamos dispostos a falar de todo, pero se a derogación do decreto do bilingüismo, e ata agora sempre se interpretou así, supón por optar por un modelo de inmersión de calquera das dúas linguas, non estou de acordo", resolveu.
