"A puntualidade dos trens de Renfe en Galicia é do 92%", di o Goberno
O Goberno prevé ter en menos dun ano o estudo "e a partir de aí" comezar o despregamento de proximidade en Galicia.
Por Europa Press / Redacción | SANTIAGO DE COMPOSTELA | 17/12/2024 | Actualizada ás 16:15
O Goberno estima que "en menos dun ano" poderá ter os resultados do estudo "e a partir de aí levar a cabo" coa operadora Renfe, e con base nas obrigacións de servizo público, "o que sería o despregamento dun núcleo de proximidade na zona de Galicia". Ademais, destacou a puntualidade dos trens no país galego, "en torno ao 92%", indicou.
Así o sinalou no Congreso o secretario xeral de Mobilidade Sustentable, Álvaro Fernández Heredia, en resposta a unha pregunta do deputado do BNG Néstor Rego, que denunciou a ausencia de proximidade como "un exemplo claro da discriminación histórica" de Galicia en relación cos investimentos en infraestruturas e transporte ferroviario.
Na súa intervención, o secretario xeral reafirmou o compromiso do Executivo central coas comunicacións ferroviarias na comunidade galega. "Efectivamente, iniciamos os traballos previos para facer un estudo dun plan de explotación para que o conxunto da zona das áreas metropolitanas galegas poidan estar comprendidas nun núcleo de proximidade", sinalou.
Os traballos "iniciáronse xa coa consultora Ineco", e estes son "os estudos previos que teñen como obxectivo considerar cal é o ámbito de actuación". É dicir, "están a recompilarse todos os datos de demanda actuais e preparando a serie de enquisas que son necesarias para estimar a demanda potencial", expuxo o titular de Mobilidade Sustentable. O que "vén referir", profundou, é "cambiar da idea de media distancia a un verdadeiro núcleo de proximidade, con posibilidade de integración tarifaria con outros modos de transporte e cun concepto metropolitano da área funcional".
PLAN DE MELLORA
Ademais do estudo de proximidade, o dirixente aproveitou a pregunta do Bloque para "sinalar tamén que actualmente se está levando a cabo o plan de mellora de puntualidade en toda a zona galega, arroxando bos resultados". "Estamos a conseguir puntualidades próximas ao 92%", precisou, e tamén sinalou que "se están mellorando servizos" do eixo atlántico aumentando as prazas, "con reforzos desde 2022 que supuxeron 104.700 prazas e reforzos adicionais en 2024 con 7.300 prazas adicionais". Tamén se iniciou o estudo informativo do 'bypss' de Betanzos, "que vai mellorar os tempos de viaxe", segundo chamou a atención.
