ADIF instalará no Eixo Atlántico ferroviario detectores que alerten da caída de obxectos á vía
O Consello de Ministros declara de emerxencia as reparacións en viadutos da A-52 en Ourense e da A-6 en Lugo
Por Europa Press / Redacción | SANTIAGO DE COMPOSTELA | 18/12/2024 | Actualizada ás 10:18
O Administrador de Infraestruturas Ferroviairias (ADIF) instalará no Eixo Atlántico, nos 144 quilómetros que van desde A Coruña ata Redondela (Pontevedra), dispositivos para detectar e alertar da caída de obstáculos e obxectos á vía.
En concreto, o Consello de Ministros autorizou este martes ao Ministerio de Transportes e Mobilidade Sustentable a licitar por 30,6 millóns de euros (IVE incluído) un contrato para reforzar a fiabilidade de tres liñas de tren convencional que suman un total de 430 km. Á parte do Eixo Atlántico, farase en tramos do Corredor Mediterráneo e da conexión de Sevilla a Cádiz.
Esta actuación permitirá colocar, nos pasos superiores que salvan o cruzamento destas liñas de ferrocarril de ancho ibérico e estradas, dispositivos que detectan a posible caída dun obxecto desde estes pasos ás vías e notifícana en remoto e en tempo real.
Tal e como destaca o Goberno, son "equipos de vangarda, que contan con tecnoloxía de mallas de fibra óptica, similares aos instalados en toda a rede de alta velocidade", e que permiten reforzar "a fiabilidade" das liñas.
REPARACIÓNS DE VIADUTOS GALEGOS
Por outra banda, o Consello de Ministros acordou este martes declarar a emerxencia para a reparación de viadutos situados en Galicia.
Un é o da Vilavella (Ourense), na A-52, por máis de 750.000 euros; mentres que os outros son os do punto quilométrico 486+800 da A-6, no termo municipal de Lugo, por uns 500.000 euros.
