Ampliada ata o 18 de xaneiro a campaña de vacinación fronte á gripe e a covid
O día 23 de decembro comeza a captación nos hospitais do Sergas para as persoas de 60 a 69 anos que aínda non se vacinaron.
Por Europa Press / Redacción | SANTIAGO DE COMPOSTELA | 18/12/2024 | Actualizada ás 14:05
A Xunta ampliará ata o sábado 18 de xaneiro a campaña de vacinación fronte á gripe e a covid para facilitar a protección contra as infeccións respiratorias agudas a todas aquelas persoas dos grupos de risco que aínda non se vacinaron. Desde o 23 de decembro, as persoas de 60 a 69 anos que non acudiron á primeira cita para vacinarse serán citadas novamente nos hospitais públicos galegos, salvo no caso do distrito sanitario da Coruña, onde se manterá aberto como punto de vacinación o recinto de Expocoruña ata o 4 de xaneiro.
Así, tal e como detallou a Xunta nun comunicado, desde o vindeiro luns 23, a vacinación ofrecerase nos hospitais de cabeceira en horario de mañá e tarde de luns a venres e nas mañás dos sábados. Os hospitais comarcais, pola súa banda, vacinarán dous días entre luns e venres e tamén os sábados pola mañá. Os horarios completos estarán dispoñibles na web do Sergas. Ademais, as persoas pertencentes aos grupos de risco poden solicitar autocita a través da aplicación Sergas Móbil, no apartado de campañas de promoción da saúde.
INCREMENTO DA COBERTURA VACINAL
Ata o momento, ao redor de 738.000 persoas xa recibiron a vacina da gripe. A Consellería de Sanidade aspira a aumentar a cobertura na poboación de maior risco. No caso das persoas de 60 a 69 anos, ao redor do 45 % xa se vacinou, sen diferenzas destacables por sexos. Na franxa de 70 a 79 anos, un 71 % dos homes vacináronse da gripe e un 66 % das mulleres. En maiores de 80, a porcentaxe de cobertura é do 85,1 % entre os homes e do 79 % entre as mulleres. Tamén poderán vacinarse ata o 18 de xaneiro o resto dos grupos de risco. No caso de nenos e nenas de 6 a 59 meses, Galicia xa supera o 60 % de cobertura, que era o obxectivo marcado para esta campaña.
No caso do persoal sanitario, aproximadamente un 50 % dos profesionais aínda non se vacinaron, polo que a Xunta, a través da Dirección Xeral de Saúde Pública, fai un especial chamamento á protección deste colectivo. Do mesmo xeito, as embarazadas forman parte da poboación diana da campaña contra a gripe, xa que protexen a súa saúde e tamén a do seu bebé. Ademais de persoas con inmunodepresión ou patoloxías respiratorias, este ano incluíuse ao persoal que traballe con menores de 6 anos como persoas de risco, por estar especialmente exposto aos virus respiratorios. Tamén poden vacinarse as persoas fumadoras, que teñen máis probabilidades de sufrir a gripe ou a covid de forma grave a causa do tabaco.
