Comeza a operación Nadal da DGT: agárdanse máis de 20 millóns de desprazamentos polas estradas españolas

A Dirección Xeral de Tráfico (DGT) prevé máis de 20 millóns de desprazamentos neste Nadal polas estradas españolas, dos que un 14 % (case 3 millóns) rexistraranse na zona Noroeste: Galicia, Asturias e Cantabria. Nesas rexións, a DGT contará con 46 persoas traballando, 358 cámaras, 411 estacións de tomas de datos, 102 estacións meteorolóxicas, 489 paneis de mensaxería variable, e 189 cámaras de recoñecemento de matrículas. No caso da Comunidade Galega, a DGT alertou sobre varios puntos conflitivos, xa sexa por circunstancias da circulación ou polas condicións meteorolóxicas.

Na provincia da Coruña, apunta a posibles problemas nas estradas A-6 (saída cara á A-9 na Coruña); AC-11 e AC-12 nos accesos á cidade herculina; AC-173 (glorietas de Santa Cristina, Bastiagueiro e Santa Cruz); AC-552 (glorieta da Grela); AG-11 (desde Ribeira a Padrón); AC-14 (acceso á cidade da Coruña desde a A-6); AG-55 e AC-550 (accesos á cidade desde Costa da Morte); AG-56 (accesos a Santiago desde Noia); AC-543 (acceso a Santiago en Vidán); AP-9 (acceso á cidade da Coruña, a Ferrol, peaxe de Teo, e peaxe de Cecebre e Macenda); N-550 (no entroncamento coa A-6, nos accesos a Santiago, a Travesía de Padrón); e na N-651 (Pontedeume). Igualmente, alerta sobre eventuais problemas por condicións meteorolóxicas en varios puntos da A-6 e da AP-9, así como da N-6, N-550 e N-634, onde podería haber xeo ou neve na calzada.

Na provincia de Lugo, sinálase como conflitivos varios quilómetros na A-6 (peche do viaduto de Ou Castro) e a N-6 (Pedrafita); e alértase de posibles condicións meteorolóxicas adversas na A-8 no Fiouco (por néboa) e entre Padornelo e A Canda, entre outras vías. Na provincia de Ourense, os puntos conflitivos están na N-120, N-525 e OU-540 (en accesos á capital e áreas comerciais) e, por meteoroloxía adversas, na A-52 e a N-525 (por néboa e xeadas en varios puntos); na AG-53 (no límite coa provincia de Pontevedra); na C-536 (Alto do Rodicio); na N-540 (Alto do Vieiro); e a N-564 (Alto de Paraño).

En Pontevedra, o aviso céntrase na A-52 (ligazón coa A-55 no Porriño) e na A-55 entre Vigo e Tui. Por posibles condicións meteorolóxicas adversas pídese especial precaución na N-120 (Alto de Fontefría); na N-525 (Alto de San Martiño e Alto de Santo Domingo); na N-541 (en Soutelo de Montes e o Alto de Paraño); na N-640 (Alto da Rocha, Alto do Marco e Alto Xindiriz); na PO-553 (Alto do Faro); e na PO-534 (Alto do Candán). Así mesmo, a DXT pide estar alerta naqueles puntos das estradas onde se están executando obras, como a AC-11, a AP-9, a N-6, a A-6, a A-52, e varios tramos de estradas nacionais con traballos de humanización, rehabilitación do firme e outras actuacións de mellora.

Unha máquina quitaneves retira a neve do asfalto, a 9 de decembro de 2024, en Pedrafita do Cebreiro | Fonte: Carlos Castro - Arquivo