Rebaixas na AP-9: os vehículos con máis de 20 viaxes ao mes terán descontos do 50% na peaxe
O Goberno central di que isto supón aforros de case 200 euros ao mes.
Por Europa Press / Redacción | SANTIAGO DE COMPOSTELA | 23/12/2024 | Actualizada ás 16:08
O Consello de Ministros, na súa reunión deste luns e a proposta do Ministerio de Transportes e Mobilidade Sustentable, aprobou aumentar as bonificacións das peaxes da autoestrada AP-9 desde o próximo 1 de xaneiro de 2025. Así, autorizouse a modificar os reais decretos de concesión desta vía para mellorar o esquema de bonificacións vixente desde 2021.
En concreto, os vehículos lixeiros que realicen máis de 20 viaxes ao mes e paguen con telepeaxe verán aumentado o desconto extra por recurrencia do 20% ao 50%, mentres que os vehículos pesados verán incrementada a bonificación desde o 20% actual ao 50%, desde a primeira viaxe e independentemente do sistema de pago e dos tramos que percorran.
Así mesmo, continúan en vigor o resto das bonificacións aprobadas en 2021 asociadas a unha viaxe de volta dentro das 24 horas seguintes á viaxe de ida e con mesma orixe-destino pero en sentido contrario. Deste xeito, o Goberno autorizou elevar aos 81,6 millóns de euros o orzamento previsto para financiar todos os descontos da AP-9 en 2025.
MÁIS DE 66 MILLÓNS DE TRÁNSITOS
Tal e como explicou o Goberno, desde finais de xullo de 2021, cando entrou en vigor a primeira mellora do esquema de bonificacións da AP-9, e ata o 30 de setembro de 2024, bonificáronse máis de 66 millóns de tránsitos de vehículos lixeiros e case 14 millóns de vehículos pesados, "xerando aforros duns 141 millóns de euros aos usuarios da autoestrada do Atlántico".
Adicionalmente, achegáronse máis de 60 millóns ao sistema de compensación das obras de ampliación da autoestrada, "evitando así elevar o incremento extraordinario de tarifas". Segundo exemplificou o Executivo central, un comercial (vehículo lixeiro) que durante un mes percorre de luns a sábado a AP-9 desde Ferrol ata Vigo, parando en Santiago, Padrón e Pontevedra, e que pola tarde volve sempre pola estrada nacional, ten dereito ao desconto do 50% de recurrencia xa que realiza 24 desprazamentos. En concreto, se non houbese descontos pagaría 576 euros ao mes en peaxes, mentres que coas bonificacións paga 288 euros. Ademais, isto supón un aforro de 172,80 euros con respecto ao desconto anterior por recurrencia extraordinaria do 20%.
Por outra banda, un camión (vehículo pesado 2) que cobre a ruta entre A Coruña e Vigo catro veces á semana aforrarase 706,4 euros en peaxes ao mes co novo desconto do 50% en cada percorrido. A peaxe dos 32 desprazamentos (ida e volta) mensuais costa sen descontos 1.412,8 euros e coa rebaixa queda en 706,4 euros. Co desconto do RD 681/2021 do 20%, pagaría 1.130,25 euros polo que ten un desconto adicional con respecto á bonificación anterior de 423,85 euros.
