A Xunta sitúa ao académico Manuel González á fronte da comisión para renovar o Plan de Normalización Lingüística

A Xunta de Galicia arrincou este xoves o proceso para renovar o Plan Xeral de Normalización da Lingua Galega coa elección do académico Manuel González como coordinador e a celebración da primeira reunión cos responsables das comisións encargadas de renovar o documento.

O conselleiro de Cultura, Lingua e Xuventude, José López Campos, foi o encargado de presidir a reunión, acompañado polo secretario xeral de Lingua, Valentín García, no Edificio Fontán da Cidade da Cultura. En declaracións posteriores á reunión, o conselleiro destacou que con estes pasos cúmprense "os prazos comprometidos" pola Administración galega.

Respecto da elección do coordinador, "paso imprescindible", sinalou que as comisións estarán guiadas por "unha figura de prestixio e autoridade indiscutible na materia", que xa desempeñou este papel durante a redacción do primeiro plan. Subliñou tamén o "respaldo e consenso sen fisuras" ao redor de González, un "bo sinal" de cara á consecución de acordos "no obxectivo común, e compartido por todos, de impulsar o prestixio e uso social do galego", que pasa, dixo, "por actualizar o plan e adaptalo á realidade social, demográfica e lingüística dos nosos días".

Así mesmo, López Campos remarcou que, desde as primeiras reunións tanto coas institucións relevantes vinculadas co idioma e cultura galegas, como cos diferentes partidos políticos, o Goberno galego mantivo "unha actitude construtiva e en positivo".

"Marcámonos o obxectivo de conseguir que todas as formacións políticas estean implicadas, comprometidas e que poidan participar non só na elaboración, senón tamén na aplicación. E no Parlamento, conseguir o apoio de todas as forzas políticas que forman parte e que teñen representación", afirmou.

"XERAR UNHA ILUSIÓN COLECTIVA"

Pola súa banda, o recentemente nomeado coordinador puxo o foco, "máis que en acertar nunha medida concreta", na importancia de "crear unha ilusión colectiva, que teñan a conciencia de que algo está a cambiar e de que se inaugura unha nova era para o galego". "Iso é fundamental porque cando se crea unha dinámica dese tipo, as transformacións sociais son moito máis fáciles", argumentou.

Por iso, reivindicou a importancia de "consultar aos grandes referentes de todos os sectores" para ver "que é o que pensan e explicarlles o que se quere facer". "Moitas veces van manifestar o seu desacordo, pero hai que tratar de convencelos, de facerlles ver que están nun país que é Galicia, cuxo principal medio de identidade é a lingua e, por tanto, é razoable que se integren con ela", indicou.

Insistiu ademais en que estas comisións serán abertas, polo que non descartan que durante o proceso de traballo se poidan ir incorporando xente cuxo punto de vista resulte "interesante" para a elaboración da estratexia. Manuel González é membro de número da Real Academia Galega, foi coordinador científico do Centro Ramón Piñeiro de Investigación en Humanidades e é catedrático emérito da Universidade de Santiago de Compostela, ademais de membro do Instituto da Lingua Galega e impulsor de diferentes iniciativas de promoción do galego.

COORDINADORES DAS COMISIÓNS

Os responsables destas comisións de traballo son: a doutora de Dereito Administrativo na Universidade de Santiago de Compostela Diana Santiago, a profesora da Universidade de Vigo Edita de Lorenzo, o experto en promoción do galego na universidade e en formación de adultos Manuel Núñez, o presidente da Asociación de funcionarios pola normalización lingüística e avogado Xoaquín Monteagudo, o catedrático de Lingua e Literatura galegas Armando Requeixo, a presidenta do Museo do Pobo Galego e profesora da Facultade de Medicina Concha Losada, a produtora e avogada Patricia Hermida, o presidente do Foro Enrique Peinador e promotor do galego en distintos ámbitos Xosé González, a sanitaria e escritora infantil Rosalía Morlán, e o experto en relacións exteriores Xosé Lago.

O conselleiro asegurou que a elección de todos os membros destes equipos está "avalada pola súa valía, tanto pola súa formación académica como pola súa experiencia profesional, vinculada sempre á área de traballo en cuestión".

O conselleiro de Cultura, Lingua e Xuventude, José López Campos, preside a primeira reunión para a renovación do Pacto Xeral de Nomalización da Lingua Galega | Fonte: Europa Press