Detidas pola estafa do 'Tocomocho': vendían falsos billetes premiados de Lotaría
A operación tivo lugar en Lugo.
Por Europa Press / Redacción | LUGO | 27/12/2024 | Actualizada ás 12:03
A Policía Nacional detivo en Lugo a tres persoas, integrantes do Clan San Segundo, acusados de realizar varias estafas co timo do 'Tocomocho', consistente en vender falsos billetes premiados de Lotaría.
Tal e como apunta a Policía, neste timo, os estafadores enganan á victima con lotaría ou cupóns que presuntamente están premiados. O 'gancho', mostrando algún tipo de discapacidade física ou psíquica, ofrece estes boletos a un prezo moi inferior ao premio, mentres que outro membro do clan fai o intento de adquirilos para enganar á vítima e que este achegue diñeiro ou xoias para facerse cos cupóns falsos.
A voz de alarma deuna unha cidadá de Lugo, que ía ser victima da estafa e que chamou inmediatamente á sala do 091, comunicando o feito. Os axentes puxeron entón en marcha un dispositivo para dar cos autores, que este ano realizaran catro estafas na cidade por un valor de varios miles de euros.
Froito deste operativo, a Policía interceptou o vehículo onde se trasladaban os autores das estafas. No seu poder atopáronse máis de 500 euros en metálico, xoias, sobres con emblemas de entidades bancarias, cartolinas e papeis para simular diñeiro, así como cupóns e boletos de lotaría caducados e non premiados que servían de reclamo para as estafas.
