Sabes cales son os teus dereitos como comprador durante o período de rebaixas?

OCU aconsella verificar a política de cambios e devolucións, así como outras condicións de venda antes de adquirir artigos durante a tempada de rebaixas, que adoita empezar o día 7 de xaneiro, xusto despois do período do Nadal, aínda que cada vez máis marcas e tendas comezan a aplicar descontos antes desta data. Para evitar problemas durante as compras, OCU pide atención aos consumidores para que coñezan os seus dereitos e as condicións obrigatorias que deben cumprir os establecementos, como indicar tanto o prezo actual como o anterior ao período de rebaixas.

As rebaixas deben aplicarse unicamente a aqueles artigos que formasen parte da oferta habitual da tenda, xa sexa en liña ou física, durante polo menos un mes e a súa calidade non pode diferenciarse en nada á que tiñan antes de aplicar o desconto. Igualmente, deben manterse tanto o período e as condicións de garantía como o servizo postventa coas mesmas obrigacións e dereitos e, en caso de ter unhas condicións especiais, debe indicarse expresamente. Entre os consellos de OCU, conservar o billete de compra é dos máis importantes para poder cambiar, reclamar ou realizar unha devolución con todas as garantías.

Así mesmo, tamén lembra que se o artigo adquirido en tenda física se atopa en perfecto estado, os establecementos non teñen a obrigación de cambialo ou devolver o diñeiro, aínda que a maioría dos comercios si manteñen esta política, non tendo a obrigación de devolver o diñeiro senón ofrecerche outro artigo a cambio ou dar un vale para gastar na tenda. Pola contra, no caso das compras en liña, o consumidor si ten dereito a cambiar ou devolver o artigo cunha data límite de 14 días naturais, aínda que o estado da compra sexa o adecuado. Por último, OCU recomenda aos cidadáns que eviten as compras compulsivas, pero que aproveiten estas datas para poder conseguir artigos a un prezo menor que noutras épocas do ano.

Rebaixas | Fonte: Álex Zea - Arquivo